„Одбројување“ на Фросина Пармаковска, објавен од издавачката куќа „Или-Или“, ја доби наградата „Роман на годината“ за 2017 година која ја доделува Фондацијата за промоција и унапредување на културните вредности „Славко Јаневски“.
Одлуката ја донесе жири во состав: Давор Стојановски, писател и минатогодишен лауреат, Ристо Лазаров, писател, Иван Додовски, писател и професор на Универзитетот Американ колеџ од Скопје, Анета Дучевска, професор и декан на Филолошкиот факултет „Блаже Коневски“, и Катерина Богоева, новинар и член на Фондацијата „Славко Јаневски“.
Пармаковска и се заблагодари на фондацијата „Славко Јаневски“ што, како што рече, ја спаси оваа награда и ја продолжи традицијата на нејзино организирање и доделување. Од 1999 до лани со непрекинат континуитет ја доделуваше згаснатиот „Утрински весник“.
„Дополнителна радост за мене е што е именувана по Славко Јаневски, едно од најголемите имиња на нашата литература, што е и дополнителна одговорност кон секој напишан збор, секоја напишана книга, кон секој читател и кон споменот на Славко Јаневски. Му се заблагодарувам и на жирито кое му ја даде довербата на „Одбројување“ да ја носи оваа награда и се надевам дека и читателите во романот ќе го најдат она што го нашло жирито“, рече Пармаковска.
„Одбројување“ е трет роман на Пармаковска која дипломирала на катедрата за Општа и компаративна книжевност, а магистрирала на Културолошките студии при Институт за македонска литература. Таа е авторка и на романите „Пишувајќи ги изгубените топки“ и „Вишнова хроника“.
Нејзиниот роман беше избран меѓу 27 пристигнати на 19-тиот конкурс за „Роман на годината“ а финалисти на наградата беа и романите „Апокалипса.мк“ на Бранко Прља, издание на „Готен“, и „Диссомнии“ на Игор Станојоски, издание на „Антолог“.
Според жирито, пристигнатите дела на годинешниот конкурс ги одликува тематска и жанровска шареноликост и јазички иновации во однос на современата лексика. Романсескната продукција, покрај плејадата докажани македонски писатели, донесе и силен бран помлади автори, чија свежина на идеи ги краси зрелост на изразот.
Генерален покровител на наградата е Комерцијална банка а.д.. Таа се состои од статуетка, плакета и паричен износ од 150.000 денари. Врачувањето на наградата ќе биде на почетокот на април.
М. И.
Фотографија: Александрос Стаматиу
