Основното јавно обвинителство Скопје започнува со постапката за расветлување на околностите под кои загинаа двајцата македонски планинари, Калина Велевска и Александар Миновски на планинскиот врв Кајмакчалан.
Надлежниот јавен обвинител издаде наредба до Секторот за внатрешни работи Скопје – Единица за насилен криминал, за да се извршат проверки во Федерацијата на планинарските спортови на Македонија по однос на тоа кој, кога и како ја организирал планинарската експедиција, кои се потребните услови за таква организација и дали тие биле исполнети, како и други околности.
„Издадена е Наредба да се направат проверки и во планинарското друштво „Трансверзалец“ – Скопје, нивните акти и одлуки врз основа на кои се организираат планинарските експедиции, потребните услови што треба да се исполнат, како и околностите под кои се спроведувало искачувањето на Кајмакчалан“, стои во соопштението на ОЈО.
По Наредба на надлежниот обвинител треба да бидат обезбедени и листинзите на појдовни и дојдовни повици од мобилните телефони на починатите планинари.
Д.М.
