Неколку опозициски партии во Србија побараа оставка од министерот за внатрешни работи Ивица Дачиќ во четврток поради третманот на полицијата кон граѓаните и студентите за време на блокадите на протестите, пишуваат српските медиуми.
Во ноќта помеѓу среда и четврток, полицијата интервенираше на неколку локации во Белград и Нови Сад каде што граѓани и студенти се собраа за да постават блокади на патиштата, а полицијата потврди наутро дека интервенирала и ги отстранила сите блокади на патиштата, и привела 79 лица, додека го проверувала идентитетот на 1.297 лица.
„На одредени места беа регистрирани спорадични инциденти, каде што полицијата постапила во согласност со законот. Инцидентите беа регистрирани на следниве локации: во Белград, Ниш, Нови Пазар и Нови Сад, каде што одреден број лица беа приведени за нарушување на јавниот ред и мир и сторени кривични дела“, соопшти српското министерство за внатрешни работи.
Националното движење на Србија (НДС) ги повика министерот Дачиќ и директорот на полицијата Драган Васиљевиќ да поднесат оставки поради, како што рече, „бруталните тепања и напади“ врз студенти и граѓани за време на протестот на булеварот Краља Александра во Белград, објави Бета.
НДС, исто така, бара утврдување на одговорноста на сите полицајци кои, според таа партија, ги прекршиле законите и процедурите и дозволиле „брутална и прекумерна употреба на сила против сопствениот народ и деца, кои се законски обврзани да ги заштитат“.
Пратеникот на Демократската партија, Зоран Лутовац, кој рече дека во среда вечерта бил пред Електротехничкиот факултет на булеварот Краља Александра во Белград, за телевизијата Н1 изјави дека полицијата била брутална, дека очигледно им било наложено да бидат груби и дека треба „да врне од оставки“.
Поранешниот претседател на Србија, Борис Тадиќ, кој ја предводи Социјалдемократската партија, на X изјави дека сите полицајци мора да знаат дека насилството врз демонстрантите не претставува заштита на Уставот на Србија, туку негово кршење.
Претседателот на Партијата за слобода и правда (ССП), Драган Ѓилас, изјави дека партијата бара итно ослободување на сите притворени лица, итна истрага и кривична одговорност за сите оние кои учествувале во, како што изјави, тепањето ученици, студенти, граѓани и странски државјани.
Српската централна партија (СРЦЕ) објави дека ќе поднесе кривични пријави против српскиот претседател Александар Вучиќ, Дачиќ и „сите учесници“ на неодамнешниот состанок меѓу државата и врвот на полицијата, на кој, како што се наведува, беше договорена несоодветна употреба на сила врз граѓаните кои протестираат.
Од партијата изјавија дека ќе поднесат кривични пријави против „сите идентификувани членови на МУП за несоодветна употреба на сила, што не е во согласност со Законот за полиција, како и за пречекорување на службените овластувања за време на бруталното тепање на граѓани и студенти синоќа во Белград“.
И претседателот на Движењето за пресврт, Јанко Веселиновиќ, побара министерот за внатрешни работи да поднесе оставка поради постапките на полицијата за време на граѓанските и студентските блокади.
„Како министер кој управува со репресивниот апарат, Дачиќ не дејствува во интерес на законот и граѓаните, туку како главен оперативец на репресија против децата, студентите и сите оние кои се залагаат за слобода и правда“, се вели во соопштението на Веселиновиќ.
Блокадите во градовите низ Србија започнаа откако студентите во блокадата повикаа на граѓанска непослушност по митингот на 28 јуни во Белград.
Д. Т.
