Поттикнати од коментарот на Жарко Јорданоски, уредник во Слободен печат, на неговиот фејсбук профил за неодговорноста на директорот на Агенцијата за млади и спорт, за поезијата која се фалсификува, за непочитувањето на својот и националниот интегритет, наспроти „сечењето вени за името“, побаравме негов коментар за скандалот со книгата во издание на АМС и отчетноста која ја побараа политичките субјекти, не само од Дарко Каевски, директорот на АМС, туку и од Владата.
„Порано гледавме многу гадости, а сега повеќе глупости и тоа е еден мал напредок на новата власт. Ова е еден мал скандал кој покажува на големата конфузија и дезорганизација на новата власт, недоволна координираност во разни владини тела и органи кои постојат. Може да се очекуваат уште многу вакви ситници кои ќе зборуваат за недоволната контрола и самоконтрола… Мене ми падна во очи што и самиот министер за култура, Алаѓозовски, во една прилика кога го прашаа дали ќе проверуваат што сѐ ќе биде реализирано од програмата за култура, изјави дека тука е народот кој ќе гледа, контролира и ќе сигнализира што не е во ред“, изјави Јорданоски, за ЦИВИЛ Медиа.
Јорданоски посочи дека самата ситуација покажува отсуство на проверка и балансирање, враќање наназад на она што е направено и како било направено, што е одлика на развиените демократски земји.
Тој, исто така, изрази задоволство што целата приказна потекна од цивилното, како што вели, новинарство, од читател што случајно ја прочитал книгата и забелешките ги пласирал јавно, на Фејсбук.
„Сето ова доведе до изјава на премиерот и Владата дека имаат разбирање за грешките, да бараат гаранции дека нема да се повторат… се создава впечаток на несериозност. Мислам дека не мора да заврши со оставка, но треба да заврши со едно освестување дека функционирањето е еден многу напорна, технолошки, работа и импровизациите доведуваат до вакви афери и скандали кои носат само негативен публицитет на власта“, изјави Јорданоски.
Јордановски истакна дека тоа што самиот „камуфлиран“ автор на спорните стихови стои зад нив, покажува во каква психотична состојба во која функционирањето на општеството ги доведува луѓето.
„Ова е една мал срамна епизода која треба да нѐ освести, освен што нѐ згрози“, истакна Јорданоски.
Што се однесува до одговорноста, тој смета дека директорот на АМС требал самиот да си поднесе оставка, а не да чека да биде повикан од јавноста.
„Кај нас оставка се дава пред „смртен грч“, како да е тоа крај на светот, наместо да биде прва реакција која ќе ги анулира јавните емоции кога повторно ќе се појави ваков случај“, заклучи Јорданоски.
Биљана Јордановска
Камера: Дехран Муратов
Комисијата се оградува од скандалозните содржини во проектот на Агенција за млади и спорт