Денеска, со посредство на Катар се ослободени Американка и нејзината ќерка кои биле држени во заложништво во Газа од страна на терористите на Хамас по нападот на исламистите врз Израел на 7 октомври.
Ослободувањето на американските заложнички од Газа доаѓа „по многу дена континуирана комуникација“ со сите страни, изјави портпаролот на катарското Министерство за надворешни работи.
Катар се надева дека дијалогот ќе доведе до „ослободување на сите цивилни заложници од секоја националност“, додаде портпаролот на Министерството за надворешни работи, Мајед ал-Ансари.
Американскиот претседател им се заблагодари на владите на Катар и Израел за нивното партнерство во обезбедувањето ослободување на двајцата американски заложници.
„Денеска, обезбедивме ослободување на двајца Американци земени како заложници од Хамас за време на ужасниот терористички напад врз Израел на 7 октомври…Јас сум пресреќен што наскоро ќе се обединат со нивните семејства“, нагласи Бајден.
Израелската влада соопшти дека двете американски заложнички чие ослободување Хамас го објави претходно денеска пристигнале во Израел.
Кабинетот на израелскиот премиер Бенјамин Нетанјаху соопшти дека двете жени, Џудит Тај Раанан и Натали Шошана Раанан, „се ослободени од терористичката организација Хамас и се на пат кон воен камп каде што ги чекаат членовите на нивните семејства“.
Медиуми во Тел Авив цитираат израелски официјални лица кои појаснуваат дека одлуката на Хамас за ослободување на заложниците била направена еднострано и дека Ерусалим не понудил ништо во замена.
