УТРИНСКИ КОЛУМНИ
Вообичаено, јас фордот си го возам како Драјвинг Мисис Дејзи, полецка и внимателно, но понекогаш, макар на миг, си мислам дека џипов е адекватното оружје за воведување ред во сообраќајниов хаос низ Скопје! Уште ако му заварам и некаков гусен радијатор напред на шината, баш би бил добар за корегирање на агресијата со која се вози низ градов: како не ми налета некој од овие што јурат по улициве, што се паркираат кој каде ќе стигне, што возат „без раце“ додека разговараат-на-телефон-пушат-цигара-и-чачкаат-нос истовремено, што семафорите и пешачките премини ги третираат како необврзни, советодавни сообраќајни помагала, а стотиците други возачи како животни непријатели кои им го успоруваат патот до следното кафе што треба некаде да го испијат…
А, веќе следниот миг морници ме облеваат, си велам – каква атавистичка, агресивна будала мора да сум и самиот што си дозволувам да се изнервирам до мерка да си помислам дека сообраќајната правда може да се земе во свои раце, што сигурно би резултирало со некаква корекција на овдешнава улична демографија. Тоа не може да е начинот, , читајте во новата колумна на Сашо Орданоски „Социјална патологија на четири тркала“
СЛЕДЕТЕ ВО ЖИВО: Денешниот Утрински брифинг од 7.30 до 11 часот е во тек!
„Утрински брифинг“ е местото каде секој работен ден од 7.30 до 11 часот, низ динамична програма со актуелни информации, анализи и разговори со гости, се поставува општествено-политичката агенда на денот.
Брза пошта, ВАША рубрика во Слободна зона: Останете гласни!
Неодамна, Цивилмедиа.мк воведе нова рубрика – „Брза пошта“, каде што авторките и авторите можат да ги овековечат своите мисли, белешки и пораки. Во трката со времето, често се нема време за пишување долги и елаборирани коментари и анализи, а потребна е брза реакција. Затоа, Редакцијата одлучи да отвори таков простор кој може да послужи и како своевидна комуникациска алатка, размена на мисли и пораки, но и вовед во пошироки анализи и мислења.
НАСТАНИ
ИЗЛАГАЊЕ: Министерот за надворешни работи Бујар Османи, денеска ќе има излагање пред членовите на Комисијата за надворешна политика на Собранието на Република Северна Македонија. Како што е најавено од МНР, шефот на дипломатијата Османи ќе ги информира членовите на собраниската Комисија за текот на разговорите и севкупните односи меѓу Република Северна Македонија и Република Бугарија.
РЕФЕРИРАЊЕ: Бугарскиот премиер Кирил Петков днеска ќе реферира пред пратениците во Народното собрание на Бугарија за резултатите од неговата посета на Скопје минатата недела, како и од средба на владите на двете земји што се одржа во Софија. Реферирањето на Петков е на барање на најголемата опозициска партија Граѓани за европски развој на Бугарија (ГЕРБ) на поранешниот бугарски премиер Бојко Борисов и ќе биде прва точка на денешното собраниското пленарно заседание.
ПРЕС КОНФЕРЕНЦИЈА: Народниот правобранител г.Насер Зибери ќе одржи прес-конференција на која ќе ги презентира податоците за почитувањето на начелото на недискриминација и соодветна и правична застапеност, како и за половата застапеност во јавниот сектор. Прес-конферецијата ќе се одржи пред седиштето на канцеларијата на Народниот правобранител, што се наоѓа на улицата „Македонија“ спроти спомен куќата на Мајка Тереза.
ДКСК: Државната комисија за спречување на корупцијата (ДКСК) денеска ќе ја одржи 60 – тата седница преку Зум комуникациската платфoрма. На дневниот ред на седницата се Предлог – записник од 57-та седница на ДКСК од 17.12.2021 година, првото продолжение на 57-та седница на ДКСК од 21.12.2021 година и Предлог записник од 57-та седница одржана на 21.12.2021 година-предмети од укажувачи, како и Предлог- записник од 59-та седница од 14.01.2022 година.
Членовите на Антикорупциска на денешната седница ќе расправаат и за постапувањето по конкретни предмети, по што, како што е најавено, ќе следуваат прашања и предлози.
СРЕДБА: Амбасадорот Дејвид Гир, шеф на Делегацијата на Европската Унија во Скопје, и Штефен Худолин, шеф за соработка во Делегацијата на ЕУ, ќе го посетат Куманово и ќе имаат средба со градоначалникот Максим Димитриевски, со што ќе го означат почетокот на општински посети во 2022 година. Евромбасадорот Гир, градоначалникот Димитриевски и Худолин ќе го посетат хотел „Солун“ во центарот на Куманово – споменик на културата кој неодамна беше преадаптиран во мултифункционален центар со поддршка од ЕУ.
КОМЕМОРАЦИЈА: Комеморација во чест на македонскиот композитор и диригент Александар Џамбазов (03.02.1936 – 25.01.2022) денеска ќе се одржи во фоајето на Националната опера и балет. Организатор на комеморацијата е Сојузот на композиторите на Македонија – СОКОМ и МРТ. Џамбазов ќе биде погребан на Градските гробишта во Бутел во 12 часот.
Александар Џамбазов почина на 25 јануари 2022 година на 85-годишна возраст. Тој беше истакнат македонски композитор, диригент, општествен деец, долгогодишен член на СОКОМ, еден од втемелувачите на македонската популарна и детска музика. Неговата уметничка сестраност и многуслојна дарба ја манифестирал не само занимавајќи се со многу уметнички дисциплини, туку и протегајќи го своето творештво во сите музички жанри, вклучувајќи ја и класичната музика.
Дел од најавите во овој текст се од сервисот на МИА.
Д. Мишев
