Пред точно пет години, стотици граѓан(к)и, новинари и граѓански активисти беа спречени од страна на полициски сили да одржат мирен протест пред Музејот на македонската борба за државност и самостојност, поради казнувањето на новинарот Томислав Кежаровски.
Протестот беше и претходно најавен, но и покрај тоа демострантите беа спречени да се доближат до зградата на Музејот најпрво со поставени огради на сите приоди до него, а потоа, и физички, од специјалците, со пресретнување, оттурнување со штитовите и со извлечени пендреци.
„На денешен ден во 2013 година новинарите го кренаа гласот против одлуката на судот да ме осуди на 4.5 години затвор, а полицијата крена рака на нив. Овој ден треба и мора да остане забележан во историјата на нашата држава, не заради Томислав Кежаровски, туку заради насилното спречување да се одржи мирен протест. Во затвор беа професори, лекари, адвокати, бизнисмени, обвинители… но никој немаше никаква поддршка. Почитувани колеги, почитувани пријатели… Од срце Ви благодарам за сè она што сторивте за мене и за зачувувањето на дигнитетот на професијата. Ве сакам сите“, напиша Томислав Кежаровски на својот фејсбук профил денеска.
ЦИВИЛ тогаш поведе меѓународна кампања под називот КЛИКНИ ЗА СЛОБОДА, заедно со „Репортери без граници“ – Германија, N-ost – Мрежа за известување за Источна Европа и Балканската истражувачка репортерска мрежа. Во заедничка реакција, овие организации оценија дека апсењето на Кежаровски е замислено со цел да го заплаши него, но и сите останати медиуми. Беџеви со слоганот Je suis Kezharovski, „Слобода за Кежо“ и други слогани се носеа низ целата земја. Тој стана еден од симболите на македонското новинарско востание.
„Апсењето на новинар затоа што го остварува неговото уставно право да ја информира јавноста, не е само нелегално, туку и целосно некомпатибилно со европските стандарди“ и е „само уште една од серијата практики на власта со кои влијае на слободата на медиумите на еден крајно негативен начин“, порачаа тогаш четирите организации.
Минатата година Кежаровски ја промовираше својата книга „Живот во кутија“, на чија промоција беа присутни сите пријатели на Кежаровски. Книгата на Кежаровски е многу повеќе од сведоштва за хоророт на Кежаровски и на неговото семејство.
Оваа книга е сведоштво за едно време во кое се изгубија сите вредости на ова наше метастазирано општество, сведоштво за еден систем од кој мора да се отарасиме, што поскоро. За никогаш повеќе да не се повтори…
„Книгата ја напишав да испратам јасна порака до политичарите и до обичниот човек. Живеевме во осум квадрати, со месеци, четворица. Различни по образование, по националност, по возраст, по секој поглед различни. Но, тоа не ни даде повод да се расправаме меѓу себе. Ако ние можевме да живееме во осум квадрати, во Македонија има простор да живеат два милиони луѓе“, рече новинарот Томислав Кежаровски во емотивниот говор за време на промоцијата.
А. Петровска