Германија ќе продолжи да ја поддржува Украина со воена помош дури и ако САД ја намалат својата помош, изјави германскиот министер за одбрана Борис Писториус на 27 април во интервју за „Тагешау“, критикувајќи ги предлозите на САД Кијив да отстапи територија на Русија во замена за мир, пренесува Кијив Индипендент.
„Украина можеше да го стори тоа сама, само пред една година, преку предавање“, рече Писториус.
„Секако, одамна сум свесен дека траен, доверлив прекин на огнот или мировен договор може да вклучува територијални отстапки. Сепак, тие не смеат да одат толку далеку како најновиот предлог на американскиот претседател (Доналд Трамп).“
Претходно, „Аксиос“ објави дека конечниот мировен предлог на администрацијата на Трамп би вклучувал признавање од страна на САД на контролата на Русија врз Крим и де факто признавање на нејзината окупација на други украински територии.
Планот, исто така, би ја спречил Украина да се приклучи кон НАТО, а воедно би ги укинал санкциите врз Русија и би ја зголемил економската соработка меѓу САД и Русија.
Германскиот министер за одбрана нагласи дека секој мировен договор што вклучува територијална загуба мора да ги земе предвид безбедносните гаранции.
„Не би се фокусирал на самите граници“, рече Писториус. „Би се фокусирал на тоа кои територии се вклучени во однос на обезбедените безбедносни гаранции“.
Писториус, исто така, рече дека Германија ќе продолжи со својата воена поддршка на Украина дури и ако САД ја прекинат нивната помош. Берлин е втор најголем воен донатор на Украина по САД.
„Ако Украина падне, ако (рускиот претседател Владимир) Путин ја добие оваа војна во смисла дека ја окупира Украина, или дури и ако е само во големи делови, тогаш ова е максимална закана за територијата на НАТО и, патем, и за соседните земји како Молдавија и Грузија“, рече тој.
„Не станува збор само за солидарност со Украина, туку за нашата безбедност и нашиот мир во Европа“.
Администрацијата на Трамп сè уште не објавила нов пакет воена помош за Украина, дури и накратко ја паузираше веќе одобрената помош во март.
За возврат, Германија објави нов пакет воена помош за Украина на 17 април, вклучувајќи четири дополнителни системи за воздушна одбрана ИРИС-Т, ракети за батериите „Патриот“ и десетици илјади куршуми муниција за разни системи на оружје.
Политичките лидери од Социјалдемократите (СПД) и конзервативната ЦДУ/ЦСУ, исто така, разговараат за можноста за испраќање ракети „Таурус“ со долг дострел во Украина.
Идниот канцелар Фридрих Мерц изрази отвореност за одобрување на испораките на „Таурус“, што претставува отстапување од претпазливиот став на досегашниот канцелар Олаф Шолц.
М. Д.
