Екстремно десничарската Партија на слободата на Австрија (ФПО) победи на парламентарните избори во неделата, што е прва победа на крајната десница на австриските парламентарни избори по Втората светска војна, но неизвесно е дали ќе успее да формира владина коалиција.
Австриската крајнодесничарска Партија на слободата (FPÖ) ја отвори вратата за нова ера, им порача на поддржувачите нејзиниот лидер Херберт Кикл, додека тие славеа невидена изборна победа, пренесува Би-би-си.
Победата на Кикл е само последна во низата изборни успеси на екстремната десница во Европа и тој ги пофали гласачите за нивниот „оптимизам, храброст и доверба“ во испорачувањето на „парче од историјата“.
ФПО претходно беше во коалиција, но второпласираната ОВП одби да учествува во владата предводена од Кикл.
Само неколку минути по затворањето на гласачките места во Виена, Министерството за внатрешни работи ги објави првите прогнозирани резултати, според кои на прво место е Австриската партија на слободата, со 29,1 отсто, најдобар резултат во нејзината историја, пренесува МИА.
Резултатот е за 13 проценти подобар од резултатот во 2019 година.
Владејачката Австриска народна партија е на второ место со 26,3 отсто, што е загуба од 11,1 отсто. Австриската социјалдемократска партија губи 0,1 отсто и го забележа најнискиот резултат досега (20,9 отсто).
НЕОС моментално е на четвртото место со 8,8 отсто, постигнат е плус 0,7 процент, Зелените загубија 5,3 отсто и се на петтото место со 8,6 отсто.
Право на учество на изборите за Националниот совет – Долниот дом на австрискиот Парламент имаа 6.346.059 австриски граѓани на возраст над 16 години.
Владата во заминување – коалиција на партијата на Нехамер и Зелените – го загуби мнозинството во долниот дом на парламентот.
Лидерот на ФПО, Хербер Кикл, поранешен министер за внатрешни работи и долгогодишен стратег, кој е на чело на партијата од 2021 година, сака да биде канцелар, но за да го стори тоа ќе треба да најде коалициски партнер за да обезбеди парламентарно мнозинство.
Сепак, лидерите на спротивставените партии најавија дека немаат намера да соработуваат со Кикл во новата влада, потсетува АП.
Главниот ривал на Кикл, актуелниот канцелар Карл Нехамер од ОВП, рече дека е „невозможно да се формира влада со некој што обожава теории на заговор“.
55-годишниот Кикл пред изборите вети дека ќе ги депортира барателите на азил и дека ќе престане да ја поддржува одбраната на Украина од Русија.
Вчера Нехамер повтори дека нема да го назначи Кикл за канцелар во коалициската влада, додека Кикл вети дека нема да ја предаде челната функција на Австриската народна партија доколку ги победи.
Тој рече дека ќе го следи политичкиот модел на унгарскиот премиер Виктор Орбан.
Во Австрија преговорите за формирање на владејачка коалиција традиционално траат со месеци, а не со недели, така што преговорите би можеле да се прошират до следната година, пишува Блумберг.
Политичките партии од крајната десница во Европската унија ја прославија неделната победа на парламентарните избори на австриската крајнодесничарска Партија на слободата како поттик за националните конзервативци во услови на подемот на крајната десница кој се припишува на стравот од имигрантите.
Драган Мишев
