Од објавувањето на јавниот повик до денеска до Град Скопје поднесени се 2.860 барања за субвенции за купување на велосипед, а според предвидениот буџет за оваа намена преостануваат средства за уште околу 300 барања, информираат од Град Скопје.
Средствата што Градот Скопје ги субвенционира се во износ од 50 проценти од вредноста на велосипедот, но не повеќе од 3.000 денари по лице, со вклучен персонален данок на доход, како и 50 проценти од вредноста на адаптираниот велосипед за лица со телесна инвалидност, но не повеќе од 90.000 денари по лице, со вклучен персонален данок на доход.
За субвенционирање на граѓаните за набавка на велосипеди во буџетот на Град Скопје за 2018 година, се предвидени 10 милиони денари, од кои девет милиони денари се предвидени за субвенции за велосипеди, додека еден милион денари за адаптирани велосипеди за лица со телесна инвалидност.
Јавниот повик се реализира по принципот „прв дојден, прв услужен“.
Правилникот за користење финансиски средства од буџетот на Град Скопје за субвенционирање на граѓаните на подрачјето на градот Скопје за купување велосипеди за 2018 година граѓаните можат да го преземат на следниот линк.
Барањето за добивање на субвенции граѓаните можат да го преземат на следниот линк.
Субвенционирањето на граѓаните за набавка на велосипеди е една од мерките на Градот Скопје за промоција на велосипедот како рекреативно и превозно средство. (МИА)
