Германската полиција разби протестен камп во вторникот во шумата во близина на фабриката на американскиот производител на електрични автомобили Тесла во близина на Берлин, наведувајќи дека ги прекршува јавниот ред и безбедноста.
Активистите за заштита на животната средина ја окупираа шумската површина од февруари во знак на протест против плановите за проширување во фабриката Телса, единствената европска фабрика на производителот на автомобили, пренесува ДПА.
Портпаролот на полицијата, Даниел Кеип, рече дека еколошките активисти постојано ги прекршиле прописите и извршиле кривични дела за време на нивниот протестен камп.
Тој рече дека полицијата, исто така, не може да воспостави контакт со водачите на демонстрантите и дека повеќе не може да претпоставува дека протестот ќе остане мирен.
Од понеделникот во кампот за протести се распоредени полицајци.
Портпаролката на демонстрантите, сепак, тврди дека одлуката на полицијата да го расчисти целиот камп, каде што живеат десетина луѓе, била непропорционална.
Бесни сме“, рече таа.
Првично, на активистите им беше наредено само привремено да напуштат дел од нивниот шумски камп изграден со куќички на дрвја поради планирана потрага по експлозив. Властите долго време го истражуваа кампот поради сомневање дека таму се чувале експлозиви.
Сепак, противниците на Тесла одбија и се искачија високо меѓу дрвјата за да избегнат да бидат отстранети од полицијата. Во понеделникот, полицијата извлече шест лица од куќите на дрвјата затоа што одбиле да заминат доброволно.
Тесла, со која раководи милијардерот Илон Маск, планира да ја прошири локацијата во берлинското предградие Грунхајде за да создаде товарна станица и простори за складирање. Производителот на автомобили предложи за оваа намена да се купи шумска површина од германската покраина Бранденбург.
„Во тек се разговори со Тесла“, изјави портпаролот на Министерството за животна средина и шумарство на Бранденбург.
М. Д.
