Заврши и првиот ден од дваесетдневната предизборна кампања, која ќе трае до 12 јули на полноќ, по што следува тридневен изборен молк.
„На овие избори е важно да си го вратиме Собранието, да ја вратиме политичката влада, а за жал ВМРО – ДПМНЕ не може да се врати се додека е водено од вакви луѓе коишто немаат став, не се воопшто одговорни и ништо не промениле за последните три години. Се е исто, кога ќе дојдат некои нови луѓе, реформирани, со проевропска ориентација, со граѓански ориентации, тогаш може да очекуваат да победат на тие избори“, порача лидерот на СДСМ, Зоран Заев од вчерашната граѓанска трибина што се одржа во Струмица.
Додаде дека досега носеле многу важни одлуки, а сега до изборите и на 15 јули граѓаните треба да донесат одлуки.
Убеден сум во мудроста на народот, во поддршката што ќе ја добиеме. Да одбереме обнова, да ја исправиме Македонија, да ја спасиме од хибридниот режим, истакна Христијан Мицкоски, претседателот на ВМРО-ДПМНЕ пред граѓаните на Охрид, на првиот предизборен митинг.
Според Мицкоски, власта во земјата можела многу да направила земјата да биде заложник на бруталната светска пандемија, но светот излегува од епидемијата, а Македонија не само што не излегла туку, како што рече, се моли за помала дневна статистика заболени.
Под слоганот „Можеме” вчера носителот на изборната единица број шест на коалицијата предводена од СДСМ, Билал Касами ја почна предизборната програма од регионот на Зајас.
На средбата со жителите на Зајас, Касами рече дека симболично почнале од Зајас, бидејќи сакаат да докажат дека се борат за еднаквост во државата.
„Движењето Беса излезе на политичката сцена како потреба за да се разбие биномот ДУИ и ДПА кои суштински ништо не измениле во положбата на Албанците во нашата земја. Ние влеговме во оваа коалиција бидеќи веруваме и убедени сме дека ќе успееме со нашиот слоган „Можеме”. Политичката и економската рамноправност во оваа земја е можна“, рече Касами.
За барањето на ДУИ за прв премиер Албанец, Касами нагласи дека дури по 20 години им текнало за Албанците дека треба да бидат рамноправни.
ДУИ имаше промотивна конвенција на кандидатите во Преспа, каде го презентираа кандидатот за прв премиер Албанец – Насер Зибери кој рече дека оваа номинација и понуда, која му ја пружи Ахмети, претставува чест за него
„Обештетување на граѓаните, одговарање на политичарите за неисполнети предизборни ветувања, следење на имотната состојба и барање доказ за потекло на имот, младите да бидат дел од системот без партиска припадност, враќање на квалитетен образовен систем е само дел од понудата на Македонски концепт на овие избори. Почеток на кампањата беше означен пред просториите на канцеларијата на Европската унија во државава како симбол на вредностите на коишто се стремиме, а сме далеку од нив“, изјави Петар Богојески од Македонски концепт на првиот ден од изборната кампања. Богојески истакна дека ова е последна шанса да се покаже дека граѓаните не се согласуваат со политичарите и дека треба да ја вратат државата во свои раце.
Претседателот на Македонската конзервативна партија, ИНТЕГРА, Љупчо Ристовски на вчерашната промоција на програмата и кандидатите за пратеници во Битола, изјави дека ќе направат пресврт на македонската политичка сцена.
Според Ристовски, нивната политичка реторика ќе влијае врз изборот на граѓаните.
Демократската партија на Албанците во Тетово ја одржа првата предизборна средба со членови, граѓани и симпатизери. Лидерот Мендух Тачи посочи дека главниот фокус на неговата партија по овие избори ќе бидат пропорционалната распределба на буџетот и консензуалната демократија.
„Овие избори се многу важни во борбата за нашата слобода, но без пушка, туку со глас. Затоа земете го вашето семејство, носете маска, и едно пенкало од дома, отворете го гласачкото ливче и таму прв е Мендух Тачи, заокружете го. Ветувам дека кога ќе дојдеме на власт ќе се работи 24 часа првите 30 денови. Но, прво треба ден и ноќ да се избориме за тоа. За албанските семејства во социјален ризик, во првите 30 денови од мандатот социјална помош за секое албанско семејство кое има потреба по шест илјади денари по член на семејство, ама не како сега шест илјади документи да пополнат. Директно на рака“, посочи Тачи.
А. П.