Судскиот совет на чело со Добрила Кацарска ја потврди пресудата од девет години затвор за поранешниот помошник министер во МВР, Ѓоко Поповски.
По втор пат тој е прогласен за виновен за делото злоупотреба на службената положба во предметот „Триста“ отворен од СЈО а се однесува на набавката на 300 возила во МВР. Покрај казната затвор, Поповски се задолжува да ја надомести и штетата на МВР во износ од над 27 милиони денари. И на првото судење, поранешниот помошник на МВР се прогласи виновен и се осуди на девет години затвор, но, Апелација го врати предметот на повторно судење.
Заедно со ова пресуда Поповски треба да лежи вкупно 13 години и шест месеци затвор, затоа што тој веќе е осуден во случајот „Тенк“ за набавката на луксузниот мерцедес. Таму, првично доби шест, а потоа Апелација му ја намали казната на четири години и шест месеци затвор. Освен Поповски во „Тенк“ беа осудени и експремиерот Никола Груевски на две години и поранешната министерка Гордана Јанкуловска на четири години затвор.
А. З.
