Претседателот на ВМРО-ДПМНЕ Христијан Мицкоски, заедно со потпретседателот Александар Николоски денеска во Будимпешта остварија средба со премиерот на Република Унгарија и претседател на сестринската владејачка партија „Фидеш“ Виктор Орбан.
На средбата со Орбан се разговарало за актуелната политичка состојба, европските перспективи на државата и начините за понатамошна соработка.
-“Граѓаните и државата не смеат да бидат заложници на погрешните и погубни политики на Зоран Заев и неговата влада, нема повеќе време за губење и е потребно да се даде датум за преговори, при што ВМРО-ДПМНЕ гарантира сериозен план по изборите за имплементација на мерки и реформи кои државата ќе ја стават на брза трака на патот кон Европската Унија, а воедно ќе се надополни изгубеното време”, се пожалил Мицкоски.
Не е познато дали Мицкоски се сретнал со „бившиот“ лидер на партијата, Никола Груевски.
Во меѓувреме, од ВМРО -ДПМНЕ не престануваат со обвинувања кон СДСМ за состојбата со корона вирусот во земјава, а посебно со последниот случај со директорката на клиниката за кожни болести за којашто велат дека присуствувала на партиски состаноци на СДСМ.
Од СДСМ им порачуваат на граѓаните да не се осврнуваат на дезинформации и лажни вести пласирани од ВМРО-ДПМНЕ, и за состојбата околу корона-вирусот да се информираат преку министерството за здравство.
*
Движењето Беса синоќа ги определи кандидатите за пратеници за претстојните парламентарни избори. Одлуките се донесени на состанок на Централното собрание во Тетово.
Во Изборна единица 1 кандидати се Кастриот Реџепи и Јонуз Фејзулах. Во двојката Бастри Бајрами и Шенаси Џеладини. Мелинда Рашиди е единствен кандидат за пратеник во ИЕ 5.
Демократската Партија на Турците (ТДП) денеска на седниците на Централниот Управен Одбор и на Централното Собрание на партијата, во врска со Предвремените Парламентарни избори кои ќе се одржат на 12 април 2020 година, донесе одлука за предизборна коалиција со СДСМ и ги избра кандидатите за пратеници во шестата и четвртата изборна единица.
Социјалдемократскиот сојуз вечерва во 18 часот во скопскиот хотел „Александар Палас“ ќе го одржи 24. Конгрес на кој се очекува да бидат објавени сите носители на листи и кандидати за претстојните парламентарни избори.
Согласно агендата, конгресот ќе има отворен и работен дел, а на почетокот на отворениот дел ќе се обраит лидерот на партијата Зоран Заев.
Од СДСМ информираат дека преносот во живо од обраќањето на Заев може да се следи и на неговата официјална фејбук страна и на Јутуб каналот на СДСМ.
Д. Тахири
