Од денеска до 11 март на полноќ граѓаните ќе можат да направат увид во Избирачкиот список преку апликацијата на веб-страницата на Државната изборна комисија www.sec.mk и во нивните подрачни канцеларии. Исто така денеска почнува и рокот за собирање потписи на група граѓани во подрачните канцеларии на Комисијата и од оваа година пред овластен нотар.
Претседателот на ДИК Оливер Деркоски вчера апелираше до сите оние што сакаат да гласаат на изборите да ги проверат своите податоци во Избирачкиот список, но исто така предупреди дека доколку немаат важечки лични документи граѓаните нема да може да гласаат.
Во однос на изборните злоупотреби, Деркоски за ЦИВИЛ Медиа изјави:
„Единствено останува на оние кои мислат дека е прекршен законот да поднесат преставки до Антикорупциска комисија, па тие да реагираат. Во иднина ќе треба овој меѓупериоден дел да се регулира строго законски за да ги ставиме во ред овие појави да не се повторуваат или злопупотребуваат. Нема друг начин. Од започнување на кампањата ДИК може да реагира, да носи одлуки, меѓутоа во овој момент сите умно и паметно се трудат да ги заобиколат законските одредби за да не може ниеден државен орган да реагира на начин како што би требало. За да се избегнат тие ситуации ќе мора и за овој период да се допрецизира во законот, да се стават забрани, точно дефинирани во дефинициите во Иборниот законик – што смее, што не смее и кои се последиците доколку се направи од денот на распишување на изборите, а не од денот на започнување на кампањата“.
Дополнителната заменик министерка во Министерството за информатичко општество и администрација, Невенка Стаменковска Стојковски денеска ја најави кампањата „За фер избори пријави притисок“ со која ги охрабрува вработените во јавниот сектор да пријават секаков вид на заплашување, притисок и поткуп на глас за време на изборите што ќе се одржат на 12 април.
Таа истакна дека вработените во јавниот сектор се слободни граѓани, и како такви треба да го остварат и своето право на глас, и додаде дека ги охрабрува и сите оние кои на било каков начин до сега биле заплашувани, им се вршело каков било притисок од било кој апсект а се вработени во јавната администртација да ги поддржат и посетат на настаните.
ЦИВИЛ го мониторира изборниот процес и апелира до граѓаните да пријавуваат нерегуларности на [email protected] и тел. 02/52 09 176.
Дијана Тахири