ВЕСТ НА ДЕНОТ: ДЗС ја објави Методологијата за пописот
Директорот на Државниот завод за статистика, Апостол Симовски, денеска ја објави Методологијата за подготовка, организација и спроведување на пописот во април 2021, каде што истакна дека македонските државјани кои се во странство може да се попишуваат на посебна апликација за попис или за нив податоци да даде некој близок. Тие со ковид ќе се попишуваат според протоколи на Министерство за здравство. Ќе има најмалку 5.500 попишувачи, а освен на терен, ќе се користат и бази на податоци од институции. Тој потенцира дека граѓаните ќе треба да одговорат на шеесетина прашања во рамки на пописот кој ќе се одржи од 1 до 21 април годинава, а смеат да не одговорат само на три прашања.
ИЗЈАВА НА ДЕНОТ: Симовски во одговор на ЦИВИЛ: Податоците од апликацијата за попис се безбедни
„Апликацијата за попис на македонски државјани кои се во странство да може сами да се попишуваат е направена и ќе биде достапна од 1 март и ќе трае до 21 април. Оваа апликација е максимално безбедна и сите мерки за безбедност се преземени и ниту едно лице кое се наоѓа во државата нема да може да се вклучи на оваа апликација, значи исклучиво вклучувањето ќе биде од странство со посебни процедури кои ќе бидат едноставни за да може граѓаните да се вклучат на апликацијата. Преземени се сите мерки за безбедност на податоците и комуникациите“, вели Апостол Симовски, директорот на Државен завод за статистика, на прашањето на ЦИВИЛ Медиа дали е направена апликацијата и колку е безбедна за попис на македонските државјани кои се во странство и дали постои можност за сајбер напад како што се случи на последните избори кога беше хакиран сајтот на Државната изборна комисија.
ИНТЕРВЈУ: Колозова: Државниот апарат како да се штити сам себе од граѓанинот, наместо да го штити граѓанинот од себе
ЦИВИЛ Медиа разговараше со една највредните претставнички на академската, научната и филозофската фела во земјава и едно од најрелевантните имиња во светската современа филозофија, проф. д-р Катерина Колозова.
ФЛЕШ ВЕСТИ
Образование – Собранието денеска, на седмата седница ја започна јавна расправа за Нацрт-концепцијата за основно образование организирана од матичната Комисија за образование, наука и спорт.
АРМ –Воените лица и цивилите во служба на АРМ нема да смеат да раководат, застапуваат и претставуваат политичка партија и да бидат членови на органи на партија, а со членство во партија нема да смеат да ја доведат во прашање професионалноста, непристрасноста и законитоста во вршењето на работите во Армијата или Министерството за одбрана
Институт за демократија -Квалитетот на дебатата во Собранието доби средна оценка 5,5 во Извештајот на Институтот за демократија од Скопје за периодот од 4 август до 31 декември 2020 година.
Мултикултура – Специјалниот владин претставник за Бугарија, Владо Бучковски за телевизија Телма потврдил дека е договорено од март сателитскиот канал на Бугарската национална телевизија – БНТ 4, освен преку операторот А1, да се реемитува и на „Макс ТВ“ на Македонски Телеком, во кој државата има свој удел. Истовремено, сателитскиот канал на Македонската телевизија да се реемитува на бугарските телевизиски оператори.
Фејсбук –Цукерберг најавува потиснување на политичките содржини од Фејсбук
Цукерберг најавува и нешто, кое е во фаза на подготовка, но за земји како нашата каде Фејсбук е доминантна социјална платформа, може да значи целосно или делумно пренасочување на другите социјални платформи Твитер и Истаграм, и тоа во фокусот на намалување на политичките содржини.
СЛОБОДНА ЗОНА
„На сите светски листи на влијание, наназад којзнае колку години, Меркел – доктор на науки од областа на квантната хемија, а покрај германски, говори и руски и англиски јазик – е на самиот врв, мерено и меѓу жените и меѓу мажите. Скромна, цврста, автентична, речиси без суета. Глобална фигура на надеж.“, пишува Сашо Орданоски во колумната Кој вели дека не може и поинаку?
Мицкоски решил лично да му се „пушти“ на премиерот, со коментар на неговата Фејсбук страница:
„Бидејќи гледам дека премиерот реши да не ги брани македонските интереси, јас ќе одговорам дека ВМРО е Македонија, а Гоце Делчев е Македонец, и тоа еден од најсветлите во македонската историја.“, пишува Џабир Дерала. Во Рафалот Што прави Мицкоски на шестиот кат?
„Место секојдневни прес-конференции на кои лидерите се обвинуваат за неспособност или се честат со атрибути, како што се криминалец, корисник на корупција, предавник и слични милозвучни пофалби да одредат датум за двобој.
Да, да вистински двобој на одредено место и со што е можно поголема јавност. За секој случај да не се договорат на некое пониско ниво во партиската номеклатура, па сѐ да изгледа познато“, Војо Маневски во колумната Двобој на наш начин.
Д. Тахири
