Светската програма за храна на ОН во вторник соопшти дека залихите во Газа се зголемуваат по прекинот на огнот постигнат со посредство на САД, но сепак се далеку од дневната цел од 2.000 тони, бидејќи само два премина се отворени, а ниту еден кон северниот дел од енклавата погоден од глад, објави Ројтерс.
Според Светската програма за храна, околу 750 метрички тони храна сега влегуваат дневно во Појасот Газа, но ова е сепак далеку под скалата на потреби по две години конфликт меѓу Израел и Хамас, кој го претвори поголемиот дел од Газа во урнатини.
„За да можеме да го постигнеме ова зголемување, мора да ги искористиме сите гранични премини во моментов“, изјави портпаролката на WFP, Абер Етефа, на брифинг за медиумите во Женева.
Таа рече дека само два од премините во Газа контролирани од Израел се оперативни – Керем Шалом на југ и Кисуфим во центарот, пишува Ројтерс.
Планот за прекин на огнот, посредуван од американскиот претседател Доналд Трамп, предвидува испраќање „целосна помош“ во Газа. Израелски безбедносен претставник изјави дека хуманитарната помош продолжува да влегува преку преминот Керем Шалом и дополнителните премини во согласност со планот, без да ги именува.
Израелскиот премиер Бенјамин Нетанјаху во саботата изјави дека граничниот премин Рафах помеѓу Газа и Египет ќе остане затворен до понатамошно известување, а неговото повторно отворање ќе зависи од предавањето на телата на починатите заложници од страна на Хамас.
Д. Т.
