На денешното продолжение на собраниската седница, откако вчера со 78 гласа „за“ беше усвоен дневниот ред меѓу другото се и предлог-амандманите XXXIII, XXXIV, XXXV и XXXVI на Уставот на Република Македонија, како и предлог-уставниот закон за прогласување на амандманите.
Премиерот Зоран Заев, на вчерашната седница ги повика пратениците да донесат историска одлука која ќе ја однесе Македонија во ЕУ и НАТО, бидејќи во спротивно земјата ќе биде изолирана и заборавена.
Заев порача дека договорот за името содржи јасни обележја за македонската посебност, при што јазикот и идентитетот се македонски, а земјата ќе носи име признаено од целиот свет. Според него, ниту подариле, ниту некој и одземал нешто на земјата кога се договориле за географската одредница, а со усвојувањето на уставните измени се заокружува процесот.
„Тој свечен чин ќе биде кулминација на сите наши напори. Израз на нашата посветеност да најдеме решение кое е во интерес на иднината и на граѓаните и на нашата земја“, посочи Заев.
Заев повика да се остават настрана партиските интереси, да се обединат сите и да ја препознаат историската одлука која треба да се донесе.
„Изборот не може да биде појасен. Успехот не може да биде поизвесен. Големината на оваа историска одлука треба да ја препознаеме сите. Вашиот глас е глас за полноправно членство во НАТО за помалку од една година. Вашиот глас за не става во европското семејство на ЕУ. Секој глас против е глас за изолација, несигурност, сиромаштија, за нови политички кризи и поголема неизвесност дури од оние кризи од нашето минато“, рече Заев.
За завршувањето на третата и финална фаза од уставните измени, кои произлегоа од Договорот од Преспа е потребно двотретинско мнозинство, кое премиерот Зоран Заев се обидува да го обезбеди, а за кое вели дека ќе се знае дали го има на денот на гласањето.
Секој амандман се утврдува со обично мнозинство, потоа се отвора општиот претрес, па претресот по текстови и секој амандман поединечно се гласа со двотретинско мнозинство. Потоа се гласа за сите амандмани заедно со двотретинско мнозинство и на крајот се отвора уставниот закон, за чие усвојување исто така е потребно двотретинско мнозинство.
Заев вчера преговараше со Беса на Биљал Касами во врска со нивните барања во однос на амандманите, а претходно беа прифатени дел од барањата на Алијансата на Албанците на Зијадин Села.
Седницата денеска ќе почне во 13 часот, како што најави вчера претседателот на Собранието Талат Џафери, по експозето на Заев пред пратенците во врска со последната фаза од уставните измени, во кое побара позитивна одлука, која ја нарече историска и можност за подобар живот за сите граѓани на Република Македонија.
По прогласувањето на амандманите пратениците треба да го изгласаат и уставниот закон за нивно спроведување. Овие амандмани ќе бидат составен дел на Уставот на Република Македонија и ќе влезат во сила со влегување во сила на Конечната спогодба за решавање на разликите опишани во резолуциите 817 (1993) и 845 (1993) на Советот за безбедност на Обединетите нации, за престанување на важноста на Привремената спогодба од 1995 г. и за воспоставување на стратешко партнерство меѓу страните и ратификацијата на Протоколот за пристапување во НАТО од Првата страна на Конечната спогодба.
Генералниот секретар на СДСМ и пратеник Александар Кирацоски вчера информираше дека е обезбедена поддршка од минимум 80 пратеници за усвојување на уставните измени.
ВМРО-ДПМНЕ и Коалицијата „За Подобра Македонија“, како што изјави и лидерот на партијата Христијан Мицкоски претходно пред Собранието, нема да учествуваат на седницата и нема да дадат легитимитет за промена на Уставот.
Пред Собранието во исто време се одржуваше протест во организација на здруженијата „Македонија блокира“, „Христијанско братство“, партијата „Единствена Македонија“, „Твордокорни“ против уставните измени. Најавија дека протестот ќе продолжи и денеска.
Македонското Собрание на 19 октомври со 80 гласа ја донесе одлуката за пристапување кон уставните измени. Иако потребното двотретинско мнозинство во правата фаза од менување на Уставот беше неизвесно до самиот почеток на гласањето, сепак во последен момент освен 72 пратеници од владејачкото мнозинство за пристапување кон изменување на Уставот гласаа и пратеници од ВМРО-ДПМНЕ и коалицијата. За втората фаза, која помина минатиот месец, беа потребни 61 глас од вкупно 120 пратеници.
М. И.
