Воспоставувањето на Француската агенција за развој (АФД) е почеток на едно ново поглавје на соработка помеѓу Франција и Република Северна Македонија. АФД е најстарата развојна агенција во светот но со огромни можности за помагање на развојот на РС Македонија, и на демократскиот и на економскиот развој со цел државата што побрзо и полесно ги постигне критериумите за членство во ЕУ.
Ова го изјави министерот за надворешни работи, Бујар Османи во својство на домаќин на денешната неформална средба со медиумите на Доминик Отберг, регионален директор на француската Агенција за развој (АФД) кој е во посета на земјава, на која присуствуваше и францускиот амбасадор Сирил Бомгартнер . Османи при тоа изрази задоволство за новата стратегија на Париз за Западниот Балкан и што брзо по потпишувањето на договорот во февруари, се развиваат активностите за нејзино воспоставување во земјава.
Според амбасадорот Бомгартнер, од денес влегуваме во повидлива фаза која е одраз на заедничката волја за зајакнување на односите помеѓу двете земји, кои традиционално се добри, но за кои понекогаш, вели, може се чини дека недостасувала суштината. Воспоставувањето на дејноста на АФД во земјава значи поддршка на долгорочен план за постигнување на економски и социјален напредок кој, вели, ќе не однесе конечно кон европска интеграција, но и регионална.
АФД е најстарата развојна агенција во светот со присуство во 115 земји. Има14 милијарди евра годишни инвестиции, работи на 4.000 проекти во различни области и вработува 2650 луѓе.
Регионалниот директор на АФД, Отберг истакна дека Агенцијата има мандат од Француската Влада од 2018 година за присуство во повеќе земји од регионот кои имаат аспирации за членство во ЕУ. Седиштето на регионалната канцеларија е во Белград, отворено е од септември 2019 година, а буџетот за Западен Балкан е во вредност од 200 до 300 милиони евра со можност да се зголемува.
Досега се присутни во три земји од ЗБ, а Северна Македонија е следната етапа. Работат на поддршка на проекти од различни областа, но пред се кои имаат директен и позитивен бенефит врз база на Парискиот климатски договор, потоа проекти од областа на социјалата со поддршка на најранливите категории на население, младите, како и на родовата еднаквост. Проекти што нема да бидат во согласност со Парискиот климатски договор или со родовата еднаквост нема да можат да бидат финансирани од АФД, вели Отберг.
Во земјите во регионот спроведуваат проекти од областа на енергетиката, социјалата, водите но и поддршка на МСП и поддршка за урбаниот транспорт. – Друг сектор се климатските закони кои ние ги финансираме во овие земји од регионот, вели Отберг.
Во Северна Македонија веќе се спроведува проект поддржан од АФД преку РИКО – регионалната канцеларија за млади за поддршка на претприемништвото кај младите и проектот „Смарт Сити“ за развој на план и стратегија на главните градови. На земјава и се на располагање и голем број фондови за поддршка на енергетската ефикасност.
Според Отберг, најприоритетна област за Северна Македонија се проектите во областа на животната средина кои имаат допирни точки со Парискиот климатски договор, а тоа се водите, енергетиката, урбаниот развој, транспортот, заштитата на природните ресурси, енергетската ефикасност…
Тој и Бомгартнер сметаат дека не се доцни со работата на АФД во земјава, бидејќи договорот меѓу двете влади е потпишан пред пет недели, а свое влијание имало и функционирањето на техничката влада и предвремените парламентарни избори.