Центарот за развој на медиуми на денешната конференција за медиуми, што се одржа во Клубот на новинари, соопшти дека програмата „Бесплатна правна помош за новинари и медиуми тужени за навреда и клевета“, од оваа година ќе го применува принципот на финансирање по случај, наместо досегашниот месечен паушал за Адвокатската канцеларија „Медарски“.
Првата измена е во тоа што бројот на случаи што ги покрива грантот е ограничен, за оваа година, на пет нови случаи на новинари и медиуми тужени или гонети поради нивното известување. Втората измена е што престанува принципот на „отворена врата“, односно, обврската на адвокатската канцеларија со која соработуваат да ги прифати сите случаи на новинари тужени за навреда и клевета.
„Поради намалениот број на нови тужби за навреда и клевета – за што, сметаме, во голема мерка е заслужна и Програмата за бесплатна правна помош – а и за да се изедначи приодот со сличните програми што во други држави ги помагаат нашите партнери од МЛДИ, се напушта таквиот пристап на „отворени врати“. Таквиот пристап, согласно праксата на другите партнери на МЛДИ од другите земји во светот каде тие даваат поддршка за слични програми за заштита на новинари и медиуми, ќе го замени пристап во кој новинарите што се соочуваат со тужби за навреда и клевета ќе треба да поминат низ краток и едноставен процес на аплицирање, кој може да се комплетира преку интернет-страната на Центарот за развој на медиуми“ стои во соопштението на ЦРМ.
Програмата за бесплатна правна помош за новинари и медиуми инволвирани во судски случаи за навреда и клевета која беше воспоставена во 2013 година, и потребата од таквата програма тогаш беше повеќе од очигледна.
„Декриминализацијата на клеветата и навредата со Законот за граѓанска одговорност за навреда и клевета во ноември 2012 година настапи во момент кога пред кривичните судови во државата имаше околу 330 активни случаи во кои новинари и медиуми беа тужени за навреда и клевета. Сите тие случаи, со стапувањето на сила на Законот за граѓанска одговорност за навреда и клевета требаше да преминат од кривична во граѓанска постапка. Во првата година, програмата покри вкупно 31 случај префрлени од кривична во граѓанска постапка“ додаваат од ЦРМ.
Во склоп на Програмата за бесплатна правна помош за новинари и медиуми, досега одбрана добиле новинари и медиуми во повеќе од 50 случаи.
Проектот е поддржан од британската организација МЛДИ (Media Legal Defence Initiative).
А.П.