„Стоп за извршителите“ е мотото на првомајскиот работнички марш, во организација на Конфедерацијата на синдикални организации на Македонија, кој ќе започне од Македонската – радио телевизија, со почеток од 10 часот.
КСОМ ги повика сите вработени во државниот и приватниот сектор да се приклучат на маршот на работниците, со цел да се презентираат барањата на работниците како Измената на Законот за работен однос и Измената на Законот за извршување.
Маршот ќе почне од МРТ, и ќе продолжи со правец на движење кон Собранието и Владата на Република Македонија.
Едни од здруженијата кои се приклучуваат кон овој марш се и здружението „Човекот над профитот“, кои велат дека иако добиле многу ветувања за решавања на проблемот, работата не е тргната од место.
„Покрај работничките права ќе се маршира и за граѓанските права. Во случајов нашата борба, која што трае неколку месеци против Законот за извршување, односно за донесување на нов Закон за извршување во интерес на сите граѓан(к)и на Република Македонија. Ги повикуваме и другите граѓански здруженија да се приклучат“, вели Владимир Куновски од здружението „Човекот над профитот“.
Тој додава дека и покрај повеќето барања кои ги имаат од властите досега е само разговарано со неколку владини претставници и со дел од пратениците, тие досега им немаат понудено никакво конкретно решение или надеж дека нешто ќе се промени.
Ангела Петровска
Камера: Дехран Муратов
Камера: Дехран Муратов