Голем пораст на оптимизмот на граѓаните во врска со политичката ситуација во земјата, со подобрување на економската ситуација и со изгледите за членство во ЕУ, покажуваат резултатите од анкетата на населението во Македонија што денеска ги објави Центарот за анкетни истражувања на Интернационалниот Републикански институт (ИРИ). Податоците биле собрани од 4 до 21 август 2017 година, преку интервјуа лице-во-лице на национално репрезентативен примерок од 1.105 испитаници, на возраст од над 18 години.
Според резултатите од анкетата, бројот на оние кои ја нарекуваат ситуацијата „критична и нестабилна“ бележи пад од 22 проценти, и тоа од 32 проценти во март 2017, на само 10 проценти во август 2017 година!
Бројот на граѓан(к)и кои ја опишуваат внатрешно-политичка ситуација како „мирна и стабилна“ се зголемил на 44 проценти во август 2017 година, од само 5-те проценти во март! Според ИРИ, оваа промена, е веројатно поврзана со неодамнешното формирање на нова влада, по две години на жесток политички конфликт и несигурност.
Процентот на оние кои ја опишуваат моменталната состојба како „напната и неизвесна“, пак, паднал за 18 проценти, од 62 проценти во март 2017, на 44 проценти во август 2017 година.
Од ИРИ посочуваат дека македонските граѓани, се пооптимистични по прашањето за изгледите за пристапувањето кон Европската унија. Бројот на оние кои мислат дека земјата сега е поблиску до пристапувањето во ЕУ, отколку кога го добила кандидатскиот статус, скокна од 13-те проценти од март 2017 година, на сегашните 41 процент!
Поддршката за членството во ЕУ и понатаму е силна – со 77 проценти, со подобрување за 5 проценти од март 2017 година.
„Додека претходните анкети на ИРИ одразуваа длабока вознемиреност и песимизам во врска со стабилноста и траекторијата на Македонија, резултатите од ова истражување се многу охрабрувачки“, изјави регионалниот директор на ИРИ за Европа, Јан Сурочак, потенцирајќи дека новата Влада треба да го препознае ова како можност да ја врати довербата на граѓаните на Македонија и да преземе суштински мерки за решавање на прашањата коишто се од најголема важност за нив.
Обновеното чувство на стабилност што се рефлектира во истражувањето, сметаат од ИРИ, може да придонело за пооптимистички поглед и кон економијата. Триесет и три проценти од анкетираните веруваат дека економијата ќе се подобри во текот на следните две години, што е зголемување за 12 проценти од март 2017. Исто така, се чини дека песимизмот во однос на квалитетот на животот во Македонија е намален, зашто, бројот на испитаници кои сметаат дека нивниот квалитет на живот се влошува, се намалил од 38 проценти во март 2017 – на актуелните 24 проценти.
Анкетата била спроведена за Центарот за анкетни истражувања преку „Брима“, со маргина на грешка – плус или минус три проценти, на среден опсег на ниво на доверба од 95 проценти.
Истражувањето е овозможено со поддршка на Агенцијата на САД за меѓународен развој (УСАИД).