Пред три дена, на 14 мај, опозициската СДСМ во Собранието поднесе предлог за Законско решение со кое би се обезбедила финансиска помош на семејствата на настраданите и на повредените во пожарот во Кочани. Предлогот не се усвои, односно, доби 18 гласа „за“, еден „воздржан“ и ниту еден „против“, пратениците од власта не гласаа за законот, односно предлогот не ја доби потребната поддршка од пратениците за да се најде на дневниот на собраниската седница.
Со овој законот се предвидуваше добивање приоритетен пристап до здравствени услуги – како за лекување, така и за рехабилитација – при што сите услуги ќе бидат покриени од државата, како во земјата, така и во странство. Исто така, се предвидуваат и измени во трудовото право: секој родител што има повредено дете да има право на неплатено отсуство.
Поддршката преку овој закон опфаќа обештетување за сите семејства што загубиле член – по 80.000 евра во денарска противвредност, како и оние кои имаат инвалидитет.
Редакцијата на ЦивилМедиа, вчера во редовниот термин за „Прашање на денот“, го постави прашањето „ Зошто владејачкото мнозинство не гласаше за помош за настраданите во Кочани?“.
„Затоа што не им е гајле за народот! Парите им се планирани за патарини, дневници и стомаци ( храна и апетисани)!“, вели граѓанин во одговор.
Понатаму, граѓаните во своите одговори не ја исклучуваат можноста дека власта ќе обезбеди помош за семејствата на настраданите и повредените во Кочани , но – пред изборите во октомври, и тоа со поголем износ на отштета, а предлогот да биде од власта.
„Ќе гласат пред избори и тоа со далеку по голема надокнада за настраданите“
„Затоа што не беше нивни предлогот, сега пред локалните избори ќе го предложат они и ќе го усвојат.“
„Секако ќе им исплати…Но со нивни предлог за износот на средствата.“, се дел од одговорите на граѓаните, што се однесуваат на тоа дека власта сепак ќе им обезбеди помош, но по свој предлог.
Според многубројните одговори од граѓанките и граѓаните, чувството дека грижата за граѓаните е сведена практична полза пред изборни процеси, односно, добивање политички поени во предизборен период, е за жал, недвојбено. Во еден од одговорите, се вели дека и пратениците од власта, и пратениците од опозицијата, ја злоупотребуваат трагедијата …
„Не ги боли, туѓи деца, срамота“, гласи еден од одговорите.
Граѓаните преку своите одговори го изразија и незадоволството од децениската корупција поради која и се случуваат вакви трагедии.
„Ќе им исплатат пред избори, и ќе ги обработат за да не штрајкуваат повеќе“, вели еден граѓанин.
Солидарноста, сочувството и помошта во нашето општество, посебно во вакви, незамисливо тешки трагедии, се познати – граѓаните секогаш се солидаризираат и нудат помош на тие што им е потребна, и тоа го очекуваат и од властите.
Оваа голема трагедија, во која се изгубија над 60 животи и згаснаа генерации, е последица од крајно несовесната работа на соодветните институции, високата корупција и неказнивоста, и затоа, покрај тоа што е морално, солидарно, човечки, но и политички, помош од власта мора да има. Пораките се јасни, граѓаните се свесни, политичарите – уште посвесни.
Редакцијата на ЦивилМедиа, ги охрабрува граѓанките и граѓаните да дадат свои одговори, пораки и сугестии на прашањата на денот. ЦИВИЛ и е простор во кој секогаш можат да се обратат со свои прашања, коментари, споделување искуства, критики или пофалби.
Сите прашања на денот може да се најдат во рубриката ФОРУМ на интернет весникот ЦивилМедиа.
Д. Т.
