Политичките лидери од Блискиот Исток реагираат на предлогот на претседателот Доналд Трамп дека Соединетите Држави „ќе ја преземат“ Газа (веројатно со помош на американските трупи) додека Палестинците кои живеат таму треба да ја напуштат.
Како што пренесува Си-ен-ен, портпаролот на Хамас, Изат Ал Ришк рече дека коментарите на Трамп го одразуваат „длабокото незнаење“ на американскиот претседател за регионот и ја потврдија пристрасноста на САД во корист на Израел.
„Газа не е заедничка земја за која било страна да одлучи да ја контролира, туку таа е дел од нашата окупирана палестинска земја и секое решение мора да се заснова на ставање крај на окупацијата и постигнување на правата на палестинскиот народ, а не на менталитетот на трговец со недвижнини и менталитетот на моќ и доминација“, рече тој.
Генералниот секретар на Палестинската национална иницијатива, д-р Мустафа Баргути, рече дека „забелешките и предлозите на Трамп се целосно кршење на меѓународното право и претставуваат повик за етничко чистење, што е воено злосторство“.
Во Израел, забелешките на Трамп беа пофалени и од членовите на владејачката партија и од опозициските фигури. Бени Ганц, претседател на Партијата за национално единство ги нарече забелешките на Трамп „креативни, оригинални и интересни“.
Опозицискиот лидер Јаир Лапид го пофали предлогот на Трамп како „добар за Израел“, но предупреди дека деталите од планот ќе треба да се проценат.
Саудиска Арабија ја потврди својата „непоколеблива“ поддршка за палестинската држава и ја повтори својата долгогодишна позиција дека нема да се заложи за нормализација на односите со Израел без такви гаранции.
Палестинците не треба да ја напуштаат Газа додека таа се обновува, му рече во средата министерот за надворешни работи на Египет, Бадр Абделати на премиерот на палестинската управа Мохамад Мостафа.
Официјалните лица се состанаа неколку часа откако американскиот претседател Доналд Трамп ги објави плановите за „преземање“ на Газа, во забелешки кои беа наиде на широки критики од палестинските политичари и арапските држави.
„Во однос на хуманитарната ситуација во Газа, на состанокот беше истакната важноста да се продолжи со проекти и програми за рано закрепнување, отстранување на урнатините и испорака на хуманитарна помош со забрзано темпо, без Палестинците да го напуштат Појасот Газа, особено со оглед на нивната приврзаност кон нивната земја и нивното одбивање да ја напуштат“, соопшти египетското Министерство за надворешни работи.
Трамп во вторникот им рече на новинарите дека „сите со кои разговарал ја сакаат идејата САД да го поседуваат тоа парче земја“, мислејќи на Газа и рече дека се надева дека Јордан и Египет ќе ги примат Палестинците кои ќе бидат принудени да ја напуштат енклавата.
Арапските нации долго време отфрлаат какво било принудно раселување на Палестинците од Газа и повикуваат на решение со две држави за израелско-палестинскиот конфликт.
Драган Мишев
