ЦивилМедиа на својата Фејсбук страница го постави ПРАШАЊЕТО НА ДЕНОТ: Што мислите за анкетите и истражувањата на јавното мислење?
Граѓаните со скепса за анкетите и истражувањата на јавното мислење
Анкетите и истражувањата на јавното мислење сѐ почесто предизвикуваат недоверба кај граѓаните. Под објавата на Фејсбук страницата на ЦИВИЛ, на прашањето „Што мислите за анкетите и истражувањата на јавното мислење?“, следуваа низа коментари кои откриваат длабоко вкоренет песимизам и сомнеж кон нивната објективност и намера.
Еден дел од граѓаните ги оценија анкетите како „нарачани“ и „лажирани“, обвинувајќи дека се прават по мерка на оној кој ќе плати повеќе. „Кој колку ќе плати“, гласи еден од коментарите, алудирајќи на манипулации со резултатите во интерес на одредени политички или бизнис групи.
Други пак сметаат дека анкетите се „глупост невидена“ и дел од „циркуз“ во кој се анкетираат претходно подготвени „свои луѓе“, без вистинско репрезентативно истражување.
Има и такви кои забележуваат дека медиумите, кои ги пренесуваат овие анкети, се под влијание на буџетски средства, што според нив значи дека и јавното мислење е однапред „креирано“.
Меѓу коментарите се појави и повик за инклузивност и правичност – да има истражувања за сите: Македонци, Албанци, Турци, христијани, муслимани, владејачки партии и опозиција. Секој, според граѓаните, има право на свое јавно мислење, без цензура.
Како заклучок, може да се каже дека дел од јавноста е длабоко разочарана од начинот на кој се спроведуваат анкетите, а уште повеќе – од начинот на кој се користат резултатите. Недостигот од транспарентност и независност доведува до целосна ерозија на довербата.
За сите коментари повелете оригиналниот пост на Фејсбук пејџот на ЦивилМедиа.
A.M.
