По случајот со нападот врз деца во Аеродром од куче, раса ротвајлер, пуштено од сопственикот, се крена голема паника кај жителите на Скопје.
Како резултат на случката, многу граѓани почнаа јавно по социјалните мрежи да се организираат за масовно труење на бездомните животни.
Според информациите што кружат, низ цела територија на град Скопје е расфрлан отров кој е забранет за продажба веќе неколку години, но сепак лесно може да се дојде до него по други канали.
Петре Шилегов денеска на прес-конфернција изјави дека Градот Скопје, во соработка со Агенцијата за храна и ветеринарство, веќе работи на изнаоѓање на системско решение за превенции и спречување на инциденти поврзани со напади на граѓани од кучиња без разлика дали е улично или куче што има сопственик.
Шилегов истакна дека проблемот ќе го решаваат преку обезбедување и контрола на бројот на уличните кучиња по пат на хумано и одговорно времено стационирање на животните.
„Градот во минатиот месец во соработка со три здруженија за заштита на животните формираше работна група за следење на состојбата на работата на стационарот Вардариште и хуманиот третман на уличните кучиња. Ова група веќе изработи извештај со препораки за трајно решавање на проблемот.
Препораките на овој извештај заедно со препораките на АХВ ќе влезат во програмата и буџетот на градот. Овие решенија ќе ја зголемат безбедноста на граѓаните и на кучињата“, изјави Шилегов.
Шилегов рече дека според информации на Град Скопје, само две пријави се доставени до МВР за отруени кучиња во Карпош и за двајца осмничени што фрлале отров.
„До крајот на јануари се очекува финално решение за проблемите, а пак чипирањето на кучињата ќе ни помага во понатамошното расправање со проблемот“, истакна Шилегов.
Здруженијата за заштита на животните апелираат до сите граѓани да не фрлат отров бидејќи е опасен за децата што се играат во парковите, најчести локаци за фрлање на отровот.
Златко Марин, градоначалник на Аеродром и Саша Богдановиќ, на Центар, на нивните фејзбук профили, јавно апелираа граѓаните да не преземаат ништо на своја рака.
Богдановиќ ги повика граѓаните доколку забележат расфрлен отров во централното градско подрачје да се јават на телефонските броеви 070 424 685 и 075 437 068. Тој исто така, им се придружи и на активистите што до доцна вечерта во населбата Капиштец го собираа расфрланиот отров од јавните површини.
Вулнет Махмути
