Додека поранешниот генерален секретар на Владата Драги Рашковски ја поминува втората вечер во истражниот затвор во Шутка, на виделина испливаа нови скандали со софтвери и сервери за кои веќе се гони кривично за злоупотреба на службена должност.
Имено, фирмата на Рашковски освен што го набавила спорниот сообраќаен софтвер, го одржувала и хостингот на Академијата за судии и јавни обвинители Павел Шатев, а при претрес во неговата канцеларија на Правниот факултет бил пронајден и софтверот за прашања на кандидатите.
-Фирмата Инвока Груп го сервисираше хостингот, а серверот со прашањата се наоѓа при Владата. Со оглед на тоа што оваа фирма сега е опфатена со постапка, Академијата за судии и јавни обвинители Павел Шатев преку Влада ќе бара друга фирма, потврди Наташа Габер Дамјановска, директор на Академија за судии и јавни обвинители за Канал 5.
Рашковски исто така во име на владиниот генерален секретаријат кон крајот на 2019 година склучил договор со охридската компанија „Ентер“ за набавка на софтвер за систем за координација во планирањето и спроведувањето на политиката за рамномерен регионален развој, во износ од 38,8 милиони денари, објави неделникот Фокус.
Станува збор за договор со времетраење од 5 месеци, со тоа што 3 месеци се предвидени за испорака и инсталација на софтверското решение, а 2 месеци за обука за користење на системот, кој никогаш не му е предаден на користење на Министерството за локална самоуправа, како надлежно за спроведување на политиките за рамномерен регионален развој, пишува Фокус.
Рашковски беше поврзан и со сомнителен тендер за набавка на опрема за контрола на летање, но оваа кривична пријава Обвинителството ја отфрли со образложение дека нема елементи за сторено кривично дело.
Вчера покрај Рашковски, 30- дневен притвор во Шутка доби и сопственикот на Инвока Груп, Даниел Станчевски, а уште двајца осомничени остануваат со одземени пасоши и забрана за напуштање на живеалиштето.
Обвинителството поведе истрагата за набавка на софтвер вреден 80.000 евра кој Рашковски го набавил од фирмата Инвока за потребите на МВР од каде тврдат дека не им бил потребен