„Сега се е јавно, корупцијата не се исплати“ е мотото на новата кампања на Владата за подигање на свеста на граѓаните за препознавање корупција. Кампањата, која на денешната прес-конференција ја промовираа премиерот Зоран Заев и вицепремиерот задолжен за борба против корупцијата и криминалот, Љупчо Николовски, е насочена кон целосно искоренување на оваа појава во општеството. Целта е да се мобилизираат и охрабрат граѓаните и јавната администрација во обезбедувањето на заштитни механизми и отпор против корупцијата.
Станува збор за широка комуникациска кампања со цел да се информира јавноста за оваа појава и да се распознае и пријави корупцијата. Изработени се три спота во кои се претставени случаи на корупција и заштитните механизми, a ќе биде креирана и посебна интерактивна веб страница.
Во кампањата Владата и граѓаните се на иста страна во борбата против корупцијата. Не постои ситна или голема корупција, ниту пак различен пристап меѓу големата и малата корупција. Мора да им се застане на патот на сите кои го корумпираат општеството, а тоа го можеме само заедно, истакна Заев на прес-конференцијата во Владата.
Порача дека никој не е заштитен и оти мора со заеднички сили и со помош на граѓаните да се искорени оваа појава, а најсилната помош Владата треба да ја добие од граѓаните. Тие треба да пријавуваат.
На проверка ќе биде и профитот кој не се совпаѓа со заработувачката, освен јавните функционери и администрацијата, ќе бидат подложни и граѓаните. посочи премиерот.
На кампањата треба да се гледа како на придонес за синхронизирана комуникација и за остварувањето на приоритетите утврдени во Националната стратегија за спречување на корупцијата и судирот на интереси 2021-2025, рече Заев.
Вицепремиерот Николовски изјави дека во изминатиот период се менува пристапот и оти сега секој може со само неколку клика да ги види сите јавни набавки, учесници во тендери и други информации.
Ова е борба во која секој поединец е важен. Резултатите зависат од сите нас и очекувам дека сите заедно ќе ја постигнеме целта – институциите да постапуваат координирано и да постапуваат, а граѓаните да пријавуваат, порача Николовски.
Посочи дека на кампањата и претходеле опсежни и длабински анализи и проценето е дека постои потреба од ваков тип на комуникација со граѓаните.
Мора да се подигне свеста на граѓаните за препознавање и да ги охрабриме да ја пријавуваат корупцијата. Имаме силна поддршка со експертиза и од наши странски соработници и во кампањата ќе биде вклучена и консултантска поддршка од нивна страна. Во следните 15 дена ќе биде промовиран и централизиранот систем за пријавување корупција и следење на сите предмети во рамки на институциите, креиран со поддршка на УСАИД, најави Николовски.