Државната изборна комисија денеска упати порака до учесниците на изборите на 12 април дека нема да прифаќаат наменски приговори за повреди на постапката на денот на изборите и за сумирање на резултатите, поднесени само за да се кочи и злоупотребува процесот.
Новина е тоа што Комисијата ќе одлучува само за повреди на постапката на денот на гласањето и за сумирање на резултатите, и тоа што приговорите од учесниците на изборите, или од нивните овластени претставници, ќе бидат доставени до ДИК треба да содржат факти и конкретен опис на евентуалните неправилности.
Со други зборови, ДИК овој пат ќе се обиде да искористи механизми со кои нема да се кочи изборниот процес. Ова можеби е добра вест, ако се спроведе до крај, поучени од искуството дека секогаш резултатите, оние официјалните, и можните прегласувања се објавуваат во 5 до 12 поради многуте пристигнати приговори, кои, ако се погледне листата од последните претседателски избори во 2019 година, најголем дел се одбиени. Како за претседателските, така и за Референдумот 2018 и за локалните избори во 2017 најголем дел од претставките доаѓаа од опозициската ВМРО-ДПМНЕ. Искуството покажа дека нивните претставки во најголем дел се и обиди за поништување на изборите или купување време онаму каде што мислат дека можат да надоместат со гласови доколку има втор круг во одредени избирачки места или изборни единици.
За очекување е и во овие, и тоа како тензични, избори, ова да биде уште една мерка за девалвација на целиот изборен процес, особено ако се на губитничката страна, и ако разликата е енормно голема. Уште посилен ефект ќе има доколку разликата е незначително мала.
Настрана приговорите, што со Избирачкиот список? Има фантоми, нема фантоми, колку лица што ќе наполнат 18 години на денот на гласање се во Избирачкиот список, со какви куршуми ќе гаѓа дијаспората, особено најпатриотската, доколку не и се овозможи да гласа?
Биљана Јордановска