ОЛИВЕР АНДОНОВ
Не, не, не се Солунски пат’рдии, токму семејни се, а и не се смешни. Семејни се затоа што Мицкоски ги измеша семејствата, па сега некако не сме сигурни чии сме. Посебно ние кои како Внатрепартиска фракција се спротивставуваме на политикантството на Мицкоски, односно не се согласуваме со „политиките“ на владата на Мицкоски и како дел од партијата кој не припаѓа на бизнис клановите туку сме цврста идеолошко-политичка основа на ВМРО-ДПМНЕ, сега сме како несакано дете. Но затоа тука се пасторчињата во владата на Мицкоски кои тој ги нарече семејство. Е сега, не ми е јасно кој од кој брак е дете и кој кому му е братучет, но мислам дека тоа е сериозен проблем во кој ќе дојде до инцест. Кој ќе биде … ќе видиме на крајот на пат’ридиите, но дека ние членовите на ВМРО-ДПМНЕ ќе бидеме онадена страна тоа го знаеме. И толку од „политиките“ на Мицкоски преку неговите недоследности во поддршката на неговото политикантско-бизнис семјство.
Вистинската социјална дефиниција на семејството во основен облик како клетка на општеството во кое се обликува личниот и социјално-културолошки карактер на човекот е составено од родители и деца. Кај нас во традиционалниот концепт родителите се татко и мајка. Можеби во политикантското семејство на Мицкоски имаме родител 1 и родител 2, а можеби и родител 3 и 4. Никогаш не се знае тоа во едни измешани врски, особено во семејство кое преку ноќ може да стане нефункционално. А што е поинтересно, таквото политикантско семејство на своите деца (а нели „и ние сме деца на Македонија“) не им нуди стабилен личен, социјален, културолошки а посебно нормален политички, општествен, културен, религиски и народносен карактер (читај идентитет). Ете така, драги мој сопартијци ние како членови на ВМРО-ДПМНЕ според теоријата за семејство на Мицкоски, не сме само сираци, ние си имаме повеќе маќеи и очуви, а и многу роднини, но тоа што загрижува од овие неприродни бракови на Мицкоски е со каков политички, но и народен карактер (идентитет) ќе излеземе на крајот кога ќе завршат пат’рдиите.
На крајот во политикантскиот брак на Мицкоски ќе биде, моите и твоите се тепаат со нашите. Но кој се наши? Засега со нормален политичко-идеолошки карактер сме само ние од Внатрепартиската фракција за демократизација и ревитализација на ВМРО-ДПМНЕ. Не верувам дека се самопреиспитале нашите сопартијци кои Мицкоски ги убедува дека треба да гласаат за кандидатите на ВЛЕН. Не затоа што се Албанци по нивната етничка припадност па не треба да се гласа, туку затоа што не е јасно каква тоа идеологија има ВЛЕН како политички субјект составен од неколку партии. Едно е сигурно, дека Касами има националистичка Големоалбанска идеологија. Од друга страна е ЗНАМ. Повторно нашите сопартијци треба да го подржат оној Дибек кој има про србо-југословенска идеологија надополнета со изразен руски сентимент.
И види чудо, јас не сум изненаден, бидејќи рекламата за нашиот носител на советничка листа во Тетово, колегата Светозаревиќ вели: „Да ја донесеме братска Србија во Тетово“. Алооо, дудуци, Бранислав Светозаревиќ е член на ВМРО-ДПМНЕ, десна про НАТО и про Европска политичка партија (барем досега декларативно), а тоа што човекот е Србин ништо не значи во политичко-идеолошкиот став. Или можеби јас сум грешка и неинформиран дека ВМРО-ДПМНЕ, пардон Мицкоски, ја сменил идеологијата декларативна од про НАТО и про Европска па се осмелил јавно да премине во про Руска, а од македонска национална преминал во српска национална? Според тоа како се поддржува ЗНАМ со нивната идеологија веројатно ќе да е нешто и тоа многу нешто сменето. Иако оваа про Руска „промена“ кај Мицкоски а со тоа и кај ВМРО-ДПМНЕ (поради неговото политикантство) е видлива низ призмата на упорното не помагање и не поддршка на Украина во нивната праведна борба за одбрана на нивната татковина, но и одбрана на Европа од диктаторот од Кремљ.
Врвот на шизофренијата во политикантското семејство на Мицкоски е дека про србско-југословенската ЗНАМ идеологија, со деловите на Стоиљковиќ и „чудното“ однесување на Светозаревиќ кој ќе ја носи братска Србија во Тетово, а под покривот – знамето на нашата партија ВМРО-ДПМНЕ, ќе гласа за Касами да биде градоначалник на Тетово со неговата Големо Албанска и националистичка идеологија. Семејство од соништата во кое се е можно.
Нашите членови збунети, клиентелистите полни со надеж, а лојалистите полудени. А што му прави лудиот на збунетиот тоа го знаеме сите. Е па сега, ако ви е убаво продолжете со семејните пат’рдии, ама потоа да не се жалите, затоа што уште многу ќе си патите.
Во семејните пат’рдии посебна повластена каста се другарчињата на Мицкоски. Тие не се членови на нашата партија, па така и не се политичко-идеолошки десничари. Официјално не се со идеолошко-политички карактер ист или сличен ниту на другите членови на семејството. Тие се посебен бизнис клан и тука за да може да се потпре на нив Мицкоски кога ќе дојде до кал’б’л’к во семејството и кога нема да се знае кој кого и зошто.
Всушност единствен член на семејството кој му е вистински лојален на Мицкоски (затоа што нема јаден што да прави и никој друг не го сака) е Љупчо Димовски. Тој јаден е како заборавен вујко, ако не му е Мицкоски да му даде нешто ќе мора семејството да го испрати во старски дом. Се зафати со реформи во подсистемот за заштита и спасување и еве веќе цели петнаесет месеци го реформира, со сесрдна стручна и командантска помош на уште еден член на семејството, Стојанче. Оној Стојанче што беше во семејството на Заев а потоа формално се разведе за да влезе во Мицковото политикантско семејство. Доколку е потребно повторно ќе се разведе, но навистина ме интересира колку наследници ќе остави во семејството на Мицкоски кога ќе си заминува (политичкото семејство – да нема збунки). Ова повеќе од аспект затоа што секој секого работи во семејството, а на Столе нивен, саатнината му е скапа (8.000 денари дневница плус плата и додатоци и привилегии), така што кога работи, работи машки. А во семејството Мицкоски ќе објаснува дека Стојанче има поголеми примања во М-НАВ отколку во семејството. Тоа е расказ за малите деца (членовите на нашата партија) на кои им се раскажуваат сказни за добра ноќ. Ама ноќта е тука, стемнето ни е веќе, само доколку можеме да видиме дека ништо не се гледа. Не се гледа драги мој сопартијци, но се чувствува. А кој што ќе почувствува…
Има во семејството и други ликови кои може да ги сместиме во категоријата од велосипед (народски кажано точак) до тротинет и кои ги користат за разни јавни глупирања во облик на млатење празна слама, закани врз наши сограѓани од други народи, ширење дезинформации, јавно лажење, пробно кршење на законите и други будалаштини кои им прилегаат на глупи Августи. Но тие се секако дел од политикантското семејство на Мицкоски и тој си ги вади од мрачните долапи кога ќе му затребаат да шират општествена реа и да кажат тоа што тој како тате нели не му личи да го каже, иако многу би сакал да го каже.
Вистинското прашање за тате Мицко е: „Дали ќе го напуштиш семејството доколку ја изгубиш довербата (легитимитетот) од оние кои не ти се во семејството и се мнозинство во Македонија, а за кои всушност требаше да работиш а не да ги лажеш“?
Вистинско прашање за бате Панче е: „Кога ќе го спасиш семејството од Мицкоски или ќе го оставиш да си игра со шија ми га Ѓура – Мацут а штетата врз Македонија да биде непоправлива“?
Вистинско прашање за Орце е: „Кој се од семејството ќе биде одговорен доколку изгубиш во трката за градоначалник, а што е многу веројатно или овој пат тебе ќе ти се заблагодари што го примиш куршумот за него“?
Вистинско прашање за сите наши – од ВМРО-ДПМНЕ кандидати за градоначалници е: „Каков проблем имате со соочувањето на јавни дебати со другите против кандидати или каде ви отиде вмровската храброст“? Доколку не го знаете одговорот прашајте го Луке, може ќе ви каже.
Доколку за една недела ќе ги видиме резултатите од работата на политикантското семејство на Мицкоски и притисокот кон сите членови на семејството (оние од нашата партија) и потоа ќе имаме многу прашања. Во основа сите наши сопартијци ги третирате како да се идиоти и тоа корисни за потребите на внатрешниот круг на политикантското семејство.
Во меѓувреме внатре во политикантското семејство покрај енормната количина на будалаштина владее и инцестен промискуитет. Е сега, кој на крајот ќе биде во „блажена“ состојба, ќе видиме. Но како и да е да си знаете драги мој сопартијци, сметката ќе ја платиме сите ние.
Некој дури и егзистенцијалната сметка ќе ја платат, и затоа да не ве изненади следниот голем бран на егзодус од Македонија и тоа на наши сопартијци. Политичката сметка ќе ја платиме сите ние како членови на ВМРО-ДПМНЕ. Најстрашна и најдолгорочна, но и најтрагична ќе биде идеолошката сметка која ќе ја плати ВМРО како македонска државотворна идеја, а како резултат на семејните пат’рдии на Мицкоски.
Толку за оваа колумна, последна пред првиот круг избори на 19ти Октомври. Следната недела нема да има неделна колумна туку понеделничка со анализа на резултатите од изборите со акцент на резултатите од гласовите за листи на советници. Во меѓувреме уживајте во семејните пат’рдии на Мицкоски и поуживајте уште една недела во сценографијата и театарот кој преку разни ефтини трикови од типот, атентати, куфери со бомби, некакви си дебилски песни, краставици во спотови, наводнувања, мајстори и слични дебилизми подготвени во домашната – семејната кујна ви ги презентираат сметајќи ве за ретардирана гласачка маса. Посебно вие од нашата партија ВМРО-ДПМНЕ.
