На потег е Собранието и пратеничките групи, вклучително и пратеничката група на ВМРО-ДПМНЕ да покаже дека ја цени Армијата да ги повлече амандманите, истакна денеска министерката за одбрана Радмила Шекеринска, одговарајќи на новинарско прашање за блокадата на опозицијата на Предлогот за измени на Законот за служба во Армијата.
-Блокадата на ВМРО-ДПМНЕ на законот за служба во Армијата не се должи на интерес да направат подобар закон. Имаа 11 години како власт да ги решат овие проблеми и не ги решија, имаа три години во опозиција да дадат вакви предлози, не ги дадоа. Блокадата се должи исклучиво на нивниот впечаток дека ако се запрат само тогаш можат да печалат политички поени, жал ми е што овој пат решија да печалат политички поени на грбот на припадниците на Армијата, нагласи Шекеринска, на прес-конференцијата со нејзиниот чешки колега Лубомир Метнар.
Според неа, голем е интересот во Армијата и секојдневно војниците и старешините прашуваат до каде е законот. На ВМРО-ДПМНЕ им порача дека сега е моментот да покажат дека интересите на државата им се на прво место и оти, како што рече, не смеат за еден човек да ја жртвуваат Армијата.
