Канцеларијата на високиот претставник (ОХР) во Босна и Херцеговина ги повика властите на ентитетот Република Српска да се „воздржат од понатамошни дејствија“ по предлог-законот за формирање резервни полициски сили, бидејќи станува збор за надлежности на институциите што бараат координирани и сеопфатни одговори на ниво на целата земја.
Денот откако Владата на РС ги усвои измените на Законот за полиција, со кои се овозможува формирање на таканаречениот помошен состав, ОХР за Радио Слободна Европа изјави дека објаснувањето дадено за формирањето на резервниот состав на полициските сили е нејасно.
„Изјавите на министерот за внатрешни работи на РС сугерираат дека целите за кои се формираат резервните полициски сили може да вклучуваат, меѓу другото, управување со границите и миграцијата, како и операции против беспилотни летала, кои се прашања во надлежност на неколку различни институции што бараат координирани и сеопфатни одговори на ниво на целата земја“, изјави ОХР.
ОХР додава дека предложеното формирање на резервни полициски сили и последователните реакции „не придонесуваат за зајакнување на мирот и стабилноста во БиХ“ и дека „со оглед на историскиот контекст на резервните полициски сили во БиХ, фактот дека оваа иницијатива генерира недоверба не е изненадувачки“.
„Во оваа светлина, решително ги повикуваме властите на РС да се воздржат од понатамошни дејствија во врска со овој законски предлог и, наместо тоа, да се вклучат во дијалог со колегите на државно ниво и во рамките на Федерацијата на БиХ“, изјавија од ОХР.
Владата на Република Српска пред два дена, го одобри Предлог-законот за измени и дополнувања на Законот за полиција и внатрешни работи по итна постапка, изјави министерот за внатрешни работи Синиша Каран, јавуваат српски медиуми.
Кога станува збор за измени на Законот за полиција и внатрешни работи, ова вклучува формирање резервна полициска сила.
„Тоа е соодветен одговор од МУП, кој е секогаш потребен, а за тоа ни е потребен поголем број полицајци“, рече Каран, додавајќи дека во моментов има недостиг од 1.019 полицајци во МУП.
„Можноста за мигрантска криза е една од причините, но и други фактори, јавни собири, сообраќај. Минатата година имаше 2.750 јавни собири, а сега добиваме прослави каде што неколку илјади полицајци ќе бидат на обезбедување. Во локалните заедници ќе ја користиме помошната полиција, кога има поплави, кога бараме исчезнати лица и ни недостасуваат полицајци“, објасни Каран.
Д. Т.
