коментира: ЏАБИР ДЕРАЛА
Штанц машината за амандмани на ВМРО-ДПМНЕ се разработи. Дури 6.000 амандмани за измени на изборниот законик поднесоа во рекорден рок, покажувајќи ја уште еднаш својата ревносност во блокирањето на сите можни процеси во земјава.
И нема сомнеж, можат да поднесат уште неограничен број амандмани, ако сакаат да го блокираат процесот. Инаку, како што знае јавноста, се работи за измени во Изборниот законик кои предвидуваат промена на изборниот модел и создавање на една единствена изборна единица, наместо досегашните шест. Тоа е предизборно ветување на СДСМ и долгогодишно барање на повеќе релевантни невладини организации во земјава.
На бројката од 6.000 амандмани за Изборниот законик, се додадоа и близу 1.000 амандмани за Предлог-законот за Академија за судии и јавни обвинители. Значи, скрибоманија пуштена на најјако.
Сосема јасно е дека капацитетот на ВМРО-ДПМНЕ за блокирање е практично неограничен. Со огромните суми пари со кои располагаат, вклучително и оние што им се доделени од буџетот на граѓанките и граѓаните, тие можат да дејствуваат погубно по секој процес, по секоја реформа што е на агендата за трансформација од заробена во демократска и европска држава.
Со тие пари се финансира и штанц машината за лажни вести, дезинформации и говор на омраза, се финансираат и прекугранични операции, а секако и црната (депресивна) кампања на ВМРО-ДПМНЕ. Навистина, овие денови гледаме дека дури ни за пари не им излегуваат луѓето на митинг, но тоа не ги расколебува, бидејќи имаат ефект со блокадата на институциите.
На тоа треба да се додадат и деветте месеци одолговлекување и блокирање на законот за Јавно обвинителство, при што непосредно беше „убиено“ и СЈО, како и сите медиумско-политички и подземни операции за дискредитација и блокада на сите процеси за враќање на правдата.
Но, сето тоа нема потреба да нѐ чуди. Ако само се сетиме на дел од големите „дела“ со кои се поврзува оваа партија, скрибоманијата и филибастерингот изгледаат како детска играчка. Доволно е да си спомнеме само 24 декември 2012, Диво Насеље, 27 април 2017… И сѐ е јасно.