пишува: ДИЈАНА ТАХИРИ
Дека општеството ни е поделено по многу суштествени прашања, како што е правичната (не)застапеност и еднаква грижа од државата за сите граѓани, (под држава подразбирам државни институции, а државата е на граѓаните), најконкретен показател за тоа се барањата на граѓаните. Од двете страни на Вардар.
Конкретно, во главниот град, Скопје. Бидејќи Скопје е поделено на лева и десна страна од Вардар, а многу успешно се доподели во десетте години владеење на Груевски и неговата широкоградост кон Ахмети, што се однесува на делот од градот што му го отстапи за да седи мирно и на готовс пред неговата заповед за спроведување на лични мегаломански ненормални и безобразни ќејфои, а за возврат му дозволи непречено движење и делување во строго определените граници на доделениот дел од градот. А ниту сега не е нешто подобро, освен кога се работи за барање гласови.
Барањата на граѓаните од урбано опремениот дел на градот се во рамките на тоа што го имаат, односно, се барања за подобрување на условите на животната средина. Од поквалитетни училишни и здравствени објекти, улици, велосипедски патеки, зелени површини и уште многу други потреби за нормално живеење.
Истите барања на граѓаните од другиот дел од градот, во којшто владее тотален неред и хаос во служба на градежната мафија што ја дели власта со сите можни „позиции“ и опозиции, не важат.
Не дека не сакаат булевари, квалитетно изградени и опремени училишни и здравствени објекти, зелени површини и се друго што е потребно за нормално живеење, туку немаат од кого да бараат. За да не дадам широк опис на состојбите во десниот дел од реката, ги повикувам новите пратеници на новата влада, тие што нога не им стапнала натаму, да направат еднодневна детална прошетка низ Серава, Гази Баба, и погоре низ Чаир.
Повикот е кон пратениците Македонци. Поголемиот број на пратениците Албанци се од општина Чаир ( освен тие од другите градови), ама они нису одавде, тие живеат во Собрание.
Додуша, во општина Чаир почна да се гради еден од 16-те кружни текови, ветени на последните локални избори. Градењето започна пред одложените предвремени избори на 12 април, и се уште трае. Веројатно ќе биде готов до следните. Во еден дел од улиците се направи простор за велосипедски патеки, коишто ги стеснија улиците дополнително, а патеките завршуваат на првите раскрсници заради инфраструктурата на улиците, така што, корисниците на велосипеди се снаоѓаат како знаат за да стигнат до центар, кадешто почнуваат другите патеки.
Се изгради и нов трговски центар ( Retail Point), нешто што навистина беше потребно во тој дел од градот, но територијално спаѓа во општина Бутел, а буџетот го полнат жителите на Чаир.
Ни претстојат избори.
