СЈО ќе се решава по летните одмори, единствен успех на власта и опозицијата за новиот закон за ЈО

Денешната средба во Министерството за правда ги оддалечи уште повеќе власта и опозицијата околу новиот закон за Јавното Обвинителство со кој треба да се реши и судбината на Специјалното јавно обвинителство.

Двете страни по средбата рекоа дека има многу точки за кои не се согласуваат, а единствено се договорија преговорите да продолжат по 15 август, по завршување на летниот одмор.

“Гледаме дека се подготвени да разговараат, но не и за губење на политичката контрола на Владата врз Обвинителството. Власта не е подготвена за системското решение за законот и да прифати концепт во кој обвинителството ќе има поголема одговорност, но и поголема доверба од јавноста дека вистински се бори со организираниот криминал и корупција. Ние предложивме некои идеи за структурата и мандатот и тие да не се врзуваат со личности екс официо затоа што согласно законот не може да се гарантиира дека некој ќе биде обвинител”, изјави Милошевски.

Тој додаде дека не може екс официо да се гарантира дека Катица Јанева и другите обвинители, сите вработени во СЈО по сила на закон ќе преминат во ЈО бидејќи се сомневаат дека тие имаат улога во случајот „Рекет“.

Според министерката за правда, Рената Десковска, барањата на ВМРО-ДПМНЕ значат централизација на Јавното Обвинителство преку поврзување на мандатот на сите обвинители со тој на државниот обвинител.

“За жал, решенија кои многу лесно го карактеризираат нивниот закон како ретрограден и сталинистички беа позиции од кои тие не отстапија на денешните преговори. Една од точките е дека бараат целосна строга централизација на системот на јавното обвинителство. Тоа значи мандатите на 27 обвинители носители на јавнообвинителската функција во Македонија да завршатт со завршувањето на мандатот на јавниот обвинител Јовески или кој било друг да биде државен обвинител. Тоа носи силна централизација и значи парализирање на системот”, изјави Десковска по средбата.

Таа обвини дека опозицијата за обид за демонтирање на целата структура на Обвинителството. А за случаите отворени од СЈО, особено оние после 18 месечниот период според неа ВМРО-ДПМНЕ бара да не бидат надлежност на новото обвинителство.

Арбен Зеќири