ИВОН ВЕЛИЧКОВСКИ
Очекувано беше Владата на ВМРО-ДПМНЕ со вчерашното одбележување на Св.Сава во Скопје да биде де факто домаќин на Вучиќевиот „српскиот свет“.
Не е изненадување ниту обидот Владата и ВМРО-ДПМНЕ така да го легитимираат и да се вклопат во пристапот на архиепископот г.г.Стефан и дел од Синодот – со кој Охридската архиепископија треба да се задоволи со т.н. „томос за автокефалност“ од СПЦ и да остане дистантна од Вселенската патријаршија.
Повторно очекувано, Мицкоски построен од Стоиљковиќ и официјално стана дел од политиката на Вучиќ, токму кога Вучиќ започна да прифаќа барањата на протестите против неговата власт, вклучително реконструкција на владата на Вучевиќ и објавување инкриминирачки документи за падот на настрешницата во Нови Сад за кои тврдеа дека не постојат.
Останувањето во салата на политичарите – Македонци при пораките на Порфириј за единство меѓу македонскиот и српскиот народ и говорот на Додик со кој де факто се негира геноцидот во Сребреница, за жал, зборува за длабока зависност на политичко Скопје од Белград.
Одмолчувањето на негирањето на геноцидот значи директно спротивставување на државната политика на Северна Македонија означена со гласањето за Резолуцијата за геноцидот во Сребреница во Генералното собрание на ОН. Одмолчувањето на проруските ставови на Додик кои ја оправдуваат агресијата врз Украина секако значи и согласување на присутните со овие позиции спротивни на демократскиот свет од Атлантикот до Уралот.
Останувајќи во салата при ваквите говори, Мицкоски во име на партијата и Владата, но и Филипче во име на своето раководство им порачаа на Македонците дека се согласуваат со политиката на „српскиот свет“ како балканска екстензија на проекцијата на рускиот.
Конечно, присуствувајќи на одбележувањето на Св.Сава во организација од добитник на орденот „Вук“, премиерот и претседател на ВМРО-ДПМНЕ, заедно со претседателот на СДСМ го легитимираат пристапот дека Балканските војни ја ослободиле „Стара Србија“ и ја припоиле кон матицата – и им покажаа среден прст не само на денешните Македонци, туку и на жртвите на Македонците, но и на Албанците при окупацијата на териториите на денешните држави Северна Македонија и Косово по Балканските и Првата Светска Војна.
Вчерашниот избор на раководствата на ВМРО-ДПМНЕ и СДСМ да бидат скопски подружници на СНС и СПС не е избор ниту на македонскиот народ ниту на нацијата на Северна Македонија. Изборот на останатите парламентарни партии да го премолчат ова е нивен избор – за вазалство или за национална позиција и етничка свест.
Текстот е личен став. Преземено од ФБ профилот на Авторот.
