Многу ми е жал што 2017 година завршува со многу убиства. За жал, убиства за коишто надлежните институции не ги пронаоѓаат убијците, изјави Нафие Селмани, граѓанска активистка, во разговор со ЦИВИЛ Медиа за Перспективи 2018.
„Ова е е многу вознемирувачко и не остава простор за надеж дека во следната, 2018 година, не очекува постабилна ситуација од оваа до сега. За мене лично, пред се е безбедноста на граѓаните и мислам дека надлежните институции и органите на јавниот ред и мир, треба да се освестат и да бидат повнимателни, и да работат н случаите, во правец на неповторување на вакви немили случки, затоа што навистина се многу вознемирувачки за мене како граѓанка и како родител“, објасни Селмани.
„Околу прогнозите за 2018, морам да кажам, со жалење, дека ме прават попесимистична отколку што сум. Имајќи ги предвид и другите случувања во земјава, како на пример нестабилноста, односно егзибициите помеѓу владејачките партнери, не останува некоја реална надеж дека ќе имаме стабилност, и реално, дека може да донесат и нови избори, за коишто јас како граѓанка воопшто не се сложувам и мислам дека Македонија во последните 12 години дефинитивно го повторува феноменот – ниедна влада да не си го реализира четиригодишниот мандат, како што е предвидено во законите на Р. Македонија.
Овој факт за мене е многу вознемирувачки, затоа што со секои избори Македонија се изложува на трошење ресурси, луѓе, финансии и во секој изборен процес речиси се се замрзнува. Им посакувам на партнерите во Владата да покажат внатрешно единство, компактност и да не ги мачат често граѓаните со нови избори“, истакна нашата соговорничка.
Овој разговор е дел од серијата видео-изјави под заеднички наслов „Перспективи 2018“ во кој учествуваа околу 20 врвни експерти и претставници на граѓанското општество.
„Перспективи 2018“ е дел од проектот „Слободни медиуми за слободно општество“, финансиран од Министерството за надворешни работи на Сојузна Република Германија.
Дијана Тахири
Камера: Дехран Муратов
Обработка на текст: Ариан Мехмети
Фотографија и монтажа: Биљана Јордановска
