Наставата во сите општински училишта во Тетово е почната и се одвива без проблеми. Во општина Тетово функционираат 12 основни и пет средни општински училишта, информираше денеска раководителот на Секторот за јавни дејности при Општина Тетово Назми Даути на средба со новинарите.
-Општина Тетово беше постојано во комуникација со раководителите на училиштата. Сме ги презеле сите чекори за да можеме да почнеме во второто полугодие без никакви проблеми. Досега немаме јавено за никаков проблем од ниту едно училиште, наставата ќе продолжи без никакви проблеми. Денес бевме во комуникација со директорите и не е пријавено нешто дека голем број од ученици отсуствуваат од наставата, истакна Даути.
На новинарско прашања дали продолжува трендот на отпишување на учениците, Даути потврди, но смета дека бројката е помала во споредба со претходната учебна година.
-Евидентно е тоа дека од почетокот на учебната година па досега, според податоците што сме ги зеле, од основните училишта отпусница зеле 57 ученици кои заминале во Запад и 17 ученици во средните училишта. Ова е за жал проблематика што нашите млади одат надвор, но треба постојано да се работи младината да останува тука. Има и од градот и од селата. Од ОУ „Истигбал“ се 17 ученици, од ОУ „Наим Фрашери“ се 18 ученици. Исто така имаме од планинските села. Осум имаме од ОУ „Рилиндја“, четири имаме од ОУ „Ѓерѓ Кастриоти-Скендербег“. Минатата година имавме повеќе од оваа година, но беше до 100 бројката, но оваа години е 74 и во основните и средните училишта. Владата треба да размислува нешто за да остане младината тука затоа што ако продолжи овој тренд за нас ќе биде многу тешко функционирањето и на училиштата, па дури и на општеството, истакна Даути.
На прашање зошто во Општина Тетово во споредба со другите рурални општини доцнат платите во образование, Даути рече дека тоа е технички проблем.
-Во јануари има нов буџет, па дури да се читаат финансиските планови, денес понеделник или утре, сите наставници во основните и во средните училишта ќе имаат плата. Додека се вчитува буџетот, училиштата немаат пристап да видат средства во нивните конта, така тие не ги пуштаа во трезор платите и затоа немаше досега, рече Назми Даути.
Општина Тетово денеска им додели решенија на 14 наставници во средни училишта за трансформација на работен однос од определено на неопределено време.
Извор: МИА
фото: ЦИВИЛ архива
