Со цел да се промовираат и да се заштитат човековите права на лицата со инвалидност, и да се зајакнат партнерствата помеѓу различни организации, јавни институции и приватниот сектор за градење капацитети за подобрување на социјалните услуги, мрежите, местата за работа и учење на оваа група на граѓани, се имплементира проектот „Градење на капацитети на организации за помош на лицата со посебни потреби во Република Македонија“.
Проектот се имплементира во периодот од ноември 2015 до мај 2017 година, од Фондацијата за одржлив економски развој ПРЕДА Плус, во соработка со Здружението на студенти и младинци со хендикеп.
Проектните активности целат кон зголемено и полеснето исполнување и уживање на човековите права на лицата со инвалидност, за што е потребно да се зголеми и да биде поефикасно нивното учество во општеството, преку дијалог и акција меѓу приватниот, јавниот и граѓанскиот сектор.
Од ПРЕДА Плус, за овој месец најавуваат промоција на шест кампањи под слоганот „За сечие добро”, кои ќе опфатат работилници и поделба на промотивно-едукативни материјали. Кампањите ќе бидат посветени на шест теми како што се: Архитектонските бариери до јавните установи, Здравствена заштита на лица со посебни потреби, Со лична асистенција до полесно и подобро функционирање, Работни места за лицата со посебни потреби во Македонија, Да создадеме можности за сите да учиме под еднакви услови и Дневни центри на локално и национално ниво.
Проектот е финансиран со грант од Националната програма на Европската унија за помош при транзиција и институционална надградба 2011, во рамки на Инструментот за предпристапна помош