Со „Зелениот караван“ на ЦИВИЛ до креирање на политика која е во соодност на зелените вредности

Преку проектот „Зелените доаѓаат“, со поддршка од Фондацијата Хајнрих Бел од Германија, со регионално седиште во Сараево (БиХ), ЦИВИЛ ги промовираше зелените вредности, преку работилници, инфо-штандови и анкети со граѓаните, низ неколку општини низ земјава.

ЦИВИЛ одржа работилница во малата сала на Народниот театар во Гевгелија (Дом на култура). Модераторка на работилницата беше Биљана Јордановска од ЦИВИЛ, а со свое излагање за проектот се претстави и претседателот на ЦИВИЛ, Џабир Дерала. Во присуство на медиумите и присутните граѓанки и граѓани, свои обраќања на тема зелени вредности, социјална правда и антинационализам имаа градоначалникот на Гевгелија, Сашо Поцков и претседателот на Советот на Општината, Тодор Ристов.

На работилницата беа поканети претставници на Општината и општинскиот совет, институциите, организациите на граѓанското општество, зелените иницијати.

Сашо Поцков, градоначалник на Општина Гевгелија/ Фотографија Јон Ајдини

Градоначалникот Поцков ги истакна капиталните инвестиции во зелените политики на локално ниво, како и социјалните политики, особено во последниот период, наметнати од пандамијата со Ковид-19.

„Слоганот со кој јас настапував на локалните избори во 2017 беше „Модерна, европска и зелена Гевгелија“. Голем дел од капиталните инфрастуктурни проекти водат кон тоа гевгелија да биде зелена општина. Со тековните работи исто така посветуваме големо внимание на зеленото. Сакам да упатам една порака како позитивна пракса од Гевгелија: голем дел од прашањата за отворање на рудници и фабрики што би можеле да бидат глоеми загадувачи на Гевгелија се одбиени на седницата на Советот на Општината, во транспарентни постапки во дослух со граѓаните. Крајната порака е дека го имаме слухот на граѓаните, на невладините организации и сè што правиме е во тој правец да ја направиме Гевгелија модерна, европска и зелена“, изјави Сашо Поцков, градоначалник на Гевгелија во заедничка изјава за медиумите со тимот на Зелен ЦИВИЛ.

„Целта на Зелениот караван е да ја зајакне јавната свест во контакт со граѓанките и граѓаните во преку 15 општини во Република Северна Македонија. Убавата Гевгелија, секогаш е на нашата проектна мапа, во сите наши проекти, затоа што овде наидуваме на инзворедна од градоначалникот и општинските власти. Сметам дека Гевгелија е добар пример, почнувајќи од јавната свест која покажа една висока зрелост за зелените вредности и за тоа како треба да се третираат еколошките теми и проблеми во едно општество. Тоа што ние се обидуваме преку Зелениот караван е да ја подигнеме јавната свест за учество на граѓанките и граѓаните и општиниските власти во креирање на една политика која е во соодност на зелените вредности. Зелените вредности започнуваат со тезата дека претставуваат почитување на човековите права и достоинство. Зелените вредности не се однесуваат само на комуналната хигиена или чистиот воздух“, изјави Џабир Дерала, претседател на ЦИВИЛ.

При својата посета во Гевгелија, ЦИВИЛ направи и интервју со градоначалникот Сашо Поцков, кој зборуваше за зелените перспективи за градот.

Зелен ЦИВИЛ ги праша граѓанките и граѓаните во Гевгелија и Неготино колку зелените вредности се негуваат во нивните општини, колку граѓаните се свесни за потребата од заштита на животната средина, што треба да се промени…

Жителите на овие две општини изразија незадоволство од општата сосотјба во контекст на зелените вредности со фокус на чистата средина на живеење, зеленилото, но и свеста кај луѓето за придонес кон заштита на животната средина и природата.

Граѓанките и граѓаните кои ги посетија инфо штандовите на Зелениот караван на ЦИВИЛ во Демир Капија и Неготино имаа можност да разменат искуства и ставови со тимот на ЦИВИЛ на тема зелени вредности, социјална правда и антинационализам.

На работилницата во Велес свое излагање за напорите Велес да биде и остане препознаен како зелен град имашеи градоначалникот на Велес, Ацо Коцевски.

Градоначалникот Коцевски зборуваше за зелените на локално ниво, но и за национализмот како општествена појава, иако Велес не е препознатлив како град каде национализмот предизвикува кофликти во меѓуетничките односи.

„Национализмот е последното прибежиште на неранимајковците“, вели Коцевски.

Градоначалникот особено се осврна на зелените проекти на општината, но и за предизвиците на локалната самоуправа во поглед на бавната децентрализација и недостигот од ингеренции за спроведување на уште поголеми, важни проекти.

ЦИВИЛ одржа инфо штандови во Велес, Кавадарци и Градско, каде граѓаните имаа можност да разменат искуства и ставови со тимот на ЦИВИЛ на тема зелени вредности, социјална правда и антинационализам.

Граѓанките и граѓаните учествуваа и во видео анкетата: „Зошто зелено? Кажи го гласно своето мислење!“.

Зелениот караван на ЦИВИЛ е дел од проектот „Зелените доаѓаат“, и е посветен на промоција и јакнење на јавната свест за зелените вредности, социјалната правда и антинационализмот. Социјалната правда и антинационализмот се дел од европските и зелените вредности кои ЦИВИЛ ги застапува во текот на своето 20-годишно постоење, а во изминатите неколку години и во партнерство со Фондацијата.

Зелениот караван ќе заврши со национална конференција посветена на зелените вредности и стратегии, како единствена одржлива алтернатива за општеството и за државата. Зелениот караван е дел од проектот „Зелените доаѓаат“ кој се спроведува во партнерство со Фондацијата Хајнирх Бел.

Минатата недела ЦИВИЛ уште еднаш остро ја осуди полициската бруталност во битолскиот случај, кога полициски службеници претепаа припадник на ромската заедница. Воедно, загрижувачки се зачестените напади, како врз припадниците на полицијата, така и врз лекарите и други службени лица.

„Полицијата мора да биде пример за законито однесување. Згрозени сме од бруталноста на полициските службеници во снимката што беше објавена денеска. Во овој случај, правната држава треба да одреди најстрога санкција според законот. Униформата не смее да биде заштита на насилниците, туку заштита од насилството. Неказнивоста мора да престане – беше ставот на ЦИВИЛ веднаш по обелоденувањето на случајот во Битола на социјалните мрежи на 24 септември. За јавноста е важно да разграничи дека полициската бруталност никако не смее да се поистовети со нападите врз службени лица. Домашното и меѓународното право прецизно одредуваат кога полициската интервенција излегува од законските рамки и преоѓа во пречекорување на овластувањата, малтретирање и бруталност.

ЦИВИЛ ги поддржува изразите на протест против полициската бруталност, како и брзата институционална реакција во која одговорните полицајци остро се санкционирани поради пречекорувањето на службените овластувања“, стои во соопштението на ЦИВИЛ.

На 2 октомври ЦИВИЛ го одбележи и Меѓународниот ден на ненасилството поклопувајќи се со роденденот на Махатма Ганди, лидер на индиското движење за независност и основоположник на филозофијата и стратегијата на ненасилство.

„ЦИВИЛ од своето основање во 1999 година ги следи принципите на ненасилство и заложба за човекови права и слободи. Како организација што се залага за свет во кој сите луѓе живеат во мирно и демократско општество, се бори за надминување на култот кон оружјето и го промовира начелото на потполна слобода на изразување, на Меѓународниот ден на ненасилство им порачува на граѓанките и граѓаните заеднички да ја прошириме пораката за сè поголемата потреба од активно учество во креирање општество кое негува толеранција, меѓусебно разбирање и почитување, градејќи заедници врз принципите на мир и ненасилство во решавање на конфликтни ситуации“, стои во соопштението на ЦИВИЛ.

„Филозофијата и практикувањето на ненасилството во политиката и во севкупниот живот во општеството, секако, подразбира мирно разрешување на конфликтите меѓу луѓето, заедниците и државите. Тоа значи превенција на било кој вид насилство, почнувајќи од физичкото, завршувајќи со вербалното. Ја користам оваа прилика, на Меѓународниот ден на ненасилството, да ја истакнам констатацијата дека живееме во време кога црната пропаганда и говорот на омразата, посредно, а често и непосредно, ги загрозуваат безбедноста, физичкиот интегритет, здравјето, имотот и достоинството на луѓето“, изјави Џабир Дерала, претседателот на ЦИВИЛ по повод Меѓународниот ден на ненасилство.