Од здружението Еко-Герила реагираа до Општина Тетово по трегедијата во која животот го загубија мајка и нејзините четири деца, поради непристапноста во тој дел од градот, како резултат на хаосот во сообраќајот.
Поради непрописно паркираните автомобили, проблем кој со години се провлекува во Тетово, противожарната единица не стигнала на време до опожарената куќа. Еко-Герила денеска излезе со реакција уптен кон Општина Тетово за немање мерки за регулација на сообраќајот што резултираше со загуба на човечки животи во пожарот.
„Тетово нема доволно ниту паркинзи, ниту подземни или наземни гаражи. Реагиравме на непочитување на членот 22 од Законот за локална самоуправа, кој наложува сите непрописно паркирани автомобили да се отстрануваат. Тоа во Тетово не се случува“, изјави Џафери за ЦИВИЛ Медиа.
На прашањето што мислат за ветувањето на градоначалничката Теута Арифи за парична помош на семејството, Арианит одговори дека пет животи се загубени и ништо нема да ги врати.
„Тие деца нема да се вратат во училиште заедно со нивните другарчиња.Треба да се помогне на семејството, таткото и неговите стари родители, да им се изгради нов дом. Но, сепак треба да бидеме внимателни да не ни се случуваат вакви трагедии во иднина. Треба да се обезбеди подобар сообраќај во градот. Тоа мислам дека е најважното сега за сега. Мајката и децата не можеме да ги вратиме, но може нешто да се направи да не се случи повторно“, изјави Џафери.
Маја Ивановска
Камера: Атанас Петровски
Обработка на текст и монтажа: Биљана Јордановска