Советот на Амбасадори соопштува дека насилството врз жените го смета за најфлагрантно кршење на човековите права, и изразуваат најостра осуда кон овој вид на насилство, а вооедно ги поддржуваат и активностите преземени во текот на 16 дена активизам во рамки на кампањата против родовото насилство на UN Women.
„Подигнување на свесноста и активирање на сите чинители во борбата против насилството врз жените е особено значајна во екот на пандемијата со Ковид-19, кога на глобално ниво е регистриран загрижувачки пораст на овој вид насилство (т.н. пандемија во сенка). За сериозноста на проблемот доволно зборува фактот дека во светски рамки една од три жени е жртва на психичко или физичко насилство, што претставува едно од најраспространетите и воедно најмалку препознаените прекршувања на човековите права, чие искоренување станува стратешка задача на секоја држава. Во овој контекст, Советот на Амбасадори изразува згрозување и најостра осуда за инцидентот во Македонската амбасада во Камбера, Австралија, кога член на семејство на вработен се заканил по живот на в.д. амбасадорката“, соопштуваат оттаму.
Советот на Амбасадори го повикува МНР да излезе со најостра реакција за настанот и да превземе соодветни дејствија за казнување на сторителот на насилството, препознавајќи ја важноста за заштита не само на жените, туку и на сите вработени во дипломатските претставништва, како и на достоинствотото на дипломатската професија и државата.
Воедно, ова е вистински момент Советот на Амбасадори повторно да укаже на значењето од селекција на квалитетен и професионален дипломатски кадар, кој поседува капацитет, свесност и одговорност да ја претставува државата на достоинствен начин во светот.
