Новинарката Билјана Спасеска Георгиевска, актуелен уредник на вестите во телевизија 21, во својата оценка за улогата на медиумите во текот на изборниот процес за предвремени парламентарни избори на 11-ти декември минатата година, на панел-дскусијата „Меѓу чеканот и наковалната: Медиумите и новинарството во изборниот процес“, што се одржа минатата недела во организација на ЦИВИЛ – Центар за слобода, посочи на тешкотиите со кои се соочувал медиумот, при обидот да се презентираат објективни, балансирани информации и ставови на релеватните политички субјекти на македонската политичка сцена.
„Недобивањето соговорници од главната владејачка партија секогаш прави проблем. Прилогот да не биде целосен или да се покрива таа празнина со партиски соопштенија коишто во последно време се лиферуваат. И сé почесто во вестите и во телевизиите, наместо лик кој ќе ги брани ставовите, ние гледаме некои графики. Тоа е нешто ново во македонското новинарство! На тој начин, не може да се надомести страната која отсуствува и тоа е еден огромен притисок за медиумите, кои не се сметаат за добредојдени кај одредени политички партии. Едноставно, постојат и имаат потреба да ја искажат приказната на сите чинители, на сите креатори на политиките и конечно должиме едно големо објаснување на граѓаните, од чии пари се финансираат и живеат сите“, рече Билјана Спасеска Георгиевска, уредник на вести во ТВ 21.
Таа истакна дека во текот на информирањето за изборната кампања, ТВ 21 ги следела мошне прецизно инструкциите на ад хок телото.
„Колку што видов, од 44 прекршочни пријави, само три се однесуваат на телевизијата во која што јас работам. И тоа не е за навивачки тонови во некои од извештаите, туку за минутажа во платената програма. Од тие 44 пријави, 33 се однесуваат на блокот провладини медиуми и практично, ад хок телото направи една рентгенска слика на она – што верувам ќе остане зацртано во историјата на македонското новинарство како еден многу лош, сив, темен период. И се надевам дека полека ќе почнеме да се извлекуваме од него“, смета Спасеска Георгиевска.
Камера: Атанас Петровски
Монтажа: Моника Талеска