Во организација на „Женска алијанса“ утре (25 август) во хотелот „Порта“ во Скопје, со почеток во 10 часот, ќе се одржи националната тркалезна маса на тема „Невладините организации и нивната улога во промоција на еднакви можности и спречување на дискриминација при вработување“
На настанот што се реализира во рамките на проектот „Безбедни и еднакви: Управување со недискриминација и диверзитет при вработувањето“, поддржан од Европската унија, говорници ќе бидат Самка Ибраимоски, министер без ресор, задолжен за имплементацијата на Стратегијата за подобрување на состојбата на Ромите во Република Македонија, Лилјана Поповска, пратеничка од ДОМ, Ивана Туфегџиќ, независна пратеничка, Светлана Цветковска од Секторот за еднакви можности при Министерството за труд и социјална политика, Љубица Дековска, самостоен стручен соработник за економски прашања во Сојузот на синдикатите на Македонија, Анета Петровска Русомароски, член на Управниот одбор и на Економско-социјалниот совет на Организацијата на работодавачи на Македонија и раководителка на Одделот за човечки ресурси и организација во ЕВН Македонија, Уранија Пировска, извршна директорка на Хелсиншкиот комитет за човекови права, Александра Цветановска, проектна менаџерка на Проектот на УСАИД за заштита на човековите права што го имплементира Македонско здружение на млади правници и Савка Тодоровска, претседателка на Националниот совет за родова рамноправност (НСРР – СОЖМ).
Целта на тркалезната маса е да ги собере релевантните организации и актери, како и сите заинтересирани чинители во областа на борбата против дискриминацијата, како би го разгледале прашањето на еднакви можности и проблемот со дискриминација на ранливите групи при вработување, би размениле знаења и искуства и би осмислиле идни иницијативи.
На настанотсе очекува да се дискутира на темите: Како можат НВО да придонесат во промоција на
различностите и сузбивањето на предрасудите во општеството? На кој начин НВО можат најефикасно да
изведуваат активности за подигнување на свеста и за јавно повикување на актерите во доменот на вработување активно да преземат чекори против дискриминацијата? Се препознава ли улогата на НВО како сојузници на синдикатите и работодавачите во активното залагање за усвојување на политики на рамноправност и забрана на дискриминацијата во вработувањето? Можат ли НВО да влијаат врз механизмите за заштита од дискриминација на полето на вработување, односно на воведување на
политики на еднаков третман во организациската практика на работодавачите и синдикатите?
