Средба на Џафери со првата потпретседателка на Националното собрание на Француската Република Рабо

Претседателот Џафери, денес, на маргините на состанокот на високо ниво на спикери на парламенти на земји членки на НАТО, оствари средба со првата потпретседателка на Националното собрание на Француската Република, Валери Рабо на нејзино барање.

Претседателот на Собранието, Џафери, изрази задоволство за динамиката на средби меѓу политичките претставници на двете држави. Ја поздрави ре-афирмираната посветеност на Франција за регионот, согласно Стратегијата за европска интеграција на Западен Балкан, со што недвојбено се потврдува стратешката ориентација за полноправно членство на нашите земји во Европската унија. Соговорничката беше информирана за актуелните случувања на полето на евроинтеграциите во земјата, како и за преземените активности за помош и поддршка на Украина, нејзините институции и нејзините граѓани.

Потпретседателката Рабо го поздрави одржувањето на оваа средба, особено по испратените пораки на претседателот Џафери во неговото обраќање на состанокот, за поголемо обединување и заедничко делување во рамките на НАТО. Беше искажан став дека оваа соработка треба да биде комплементарно надополнета со целите на Европската унија, особено имајќи предвид колку е постигнато во изминатата година во зајакнување на нејзината стратешка автономија.

Од нејзина страна беше потенциран концептот на претседателот Макрон за развој на Европската унија и унапредување на евроинтегративниот пат на земјите кандидати и беше искажана поддршка за следните чекори кои треба да се преземат во Република Северна Македонија за продолжување со процесот на преговори за членство во Унијата.

Соговорниците беа согласни дека соработката меѓу двата парламента треба да продолжи преку Групите за пријателство и соработка и да се унапредува во иднина. Претседателот Џафери иницираше подигнување на соработката на повисоко ниво, на претседатели на парламенти, преку остварување на билатерални посети во Скопје и Париз оваа година, со неговата колешка во Националното собрание на Француската Република, Јаел Брон Пиве.