Дејан Ставриќ, еден од основачите и член на Комитетот за заштита на правата, во пресрет на конференцијата која ќе се одржи утре (16 септември), за ЦИВИЛ Медиа зборува за основните идеи на Комитетот, за условите во затворот „Шутка“ и за борбата за воспоставување на вистински правен систем во Македонија.
„Како политички затвореник во времето на ВМРО-ДПМНЕ, како жртва на еден полициско-политички монтиран случај, во карикатурата од тогашното, а и сегашното судство, ме натера да бидам еден од идејните творци на овој Комитет. Мојот случај и е познат на јавноста… Во Комитетот за заштита на човековите права се обединети речиси сите политички затвореници од мандатот на ВМРО-ДПМНЕ, бројот не е мал, во него членуваат околу 300 до 350 луѓе, неистомисленици или противници на таа власт“, вели Ставриќ.
Тој нагласи дека основната идеја е да придонесат во реализирање на вистински правен систем, на правна држава: „Гледаме дека новата власт има такви интенции, но исто така, гледаме дека не брзаат многу во спроведувањето“.
За условите во затворот „Скопје“ во Шуто Оризари, каде беше приведен, Ставриќ вели дека се дури полоши од „Идризово“.
„Условите се лоши, дури мислам дека условите во затворот ‘Шутка’ се полоши отколку во затворот ‘Идризово’ каде што беше премиерот. Таму се обавува оној незаконски притвор, кој претходната власт го спроведуваше сето ова време и заради кој целокупното наше правосудство и обвинителство имаше замерки од Европската комисија, секоја година. Во ред е тоа што премиерот го посетил ‘Идризово’, треба да ја посети и ‘Шутка’, но многу поважно е да работи на причините за полнењето на тие затвори со невини луѓе, а тоа се обвинителството и судството“, изјави Ставриќ.
„Последиците од кршењето на човековите права, и тоа што кај нас стана нормална работа да се кршат човековите права во секоја судска постапка, се огромни и за самото општетство! Нема зошто Република Македонија да ги плаќа грешките на некои извршители на власта, кои наместо да бидат обвинители и судии и да ја работат својата работа, работат по нечиј налог, незаконски и непрофесионално, на нечија штета… А таа нечија штета се стотици и илјадници граѓани на Република Македонија кои, еве да речеме, не се согласуваат со власта. Тоа е седумнаесетти век и тоа не смее да се дозволи понатаму!“, истакна д-р Ставриќ во интервјуто за ЦИВИЛ Медиа.
Текст и монтажа: Маја Ивановска
Камера: Дехран Муратов
