Украина може да користи оружје од домашно производство за да погоди цели во Русија и не и треба дозвола од САД за тоа, изјави портпаролот на американскиот Стејт департмент Метју Милер на брифингот на 30 септември.
Кијив постојано ветува дека нема да ја нападне руската територија со оружје со долг дострел обезбедено од западните сојузници без официјално одобрение. За возврат, Украина изврши успешни напади врз цели во Русија со рачно изработени оружја, како беспилотни летала со долг дострел.
Како што пренесува Кијив индипендент, во текот на изминатата година, Украина уништи или оштети над 200 воени објекти во Русија користејќи технологија „рој дронови“, изјави минатиот месец министерот за одбрана Рустем Умеров.
Според Милер, Кијив може да користи „многу“ оружје од домашно производство и има „огромно количество материјал за да се брани“.
Украина, исто така, се надева на дозвола за употреба на ракети со долг дострел, испорачани од Запад, кои веќе ги поседува за да напаѓа воени цели лоцирани длабоко во руската територија.
Очекувањата беа големи минатиот месец пред средбите меѓу претседателот Џо Бајден и британскиот премиер Кир Стармер во Вашингтон, но не беше донесена најава за одлука.
На прашањето зошто Вашингтон не може да и дозволи на Украина да користи оружје испорачано од САД за да возврати, портпаролот рече дека Белата куќа сеопфатно ги разгледува сите можности, тактики и поддршката за Украина.
„Кога одобруваме каков било нов систем на оружје или некоја нова тактика, гледаме како тоа ќе влијае на целото бојно поле и на целата стратегија на Украина. И тоа е она што ќе продолжиме да го правиме“, истакна Милер. .
„И ако го погледнете оружјето што им го дадовме, јасно ставивме до знаење дека тие можат да го користат за да возвратат на руските цели преку границата кои вршат напади… Секогаш бараме да видиме дали има дополнителни алатки што можеме да им ги обезбедиме, додаде тој.
Кон крајот на август, Умеров им достави на високите американски функционери список на цели во Русија што Украина сака да ги погоди со ракетите со долг дострел ATACMS испорачани од САД, кои вклучуваат аеродроми што ги користи руската армија за да изврши напади врз населени центри низ Украина.
Драган Мишев
