Властите во канадската провинција Квебек соопштија дека дождот и помошта однадвор би можеле да помогнат во борбата против повеќе од 100 шумски пожари кои се активни и создаваат облаци од чад поради кои жителите во градовите на брегот на Атлантикот се без здив, објавија локалните медиуми.
Официјални лица велат дека до понеделник ќе има околу 1.200 пожарникари, вклучително и над 100 од Франција, кои ќе се борат со пожарите во шумската провинција каде живеат 8,5 милиони луше и која зафаќа површина поголема од Германија, Шпанија и Франција заедно.
Се предвидува малку дожд… Во следните неколку дена постои ризик ситуацијата да остане критична. Но, доаѓањето на француските пожарникари навистина ќе помогне, изјави пред новинарите министерката за шумарство Мајт Бланшет Везина.
До синоќа имало 422 пожари ширум Канада, од кои 125 во Квебек. Канадските шумски пожари се случуваат редовно во топлите летни месеци, но обемот на сегашниот пожар – и неговиот ран почеток – е без преседан.
Федералниот метеоролог Џералд Ченг изјави вчера дека врнежите се очекуваат во Квебек во текот на викендов, но додаде дека „останува да се следи дали тој дожд … е доволен за гаснење на пожарите“.
Властите во пацифичката провинција Британска Колумбија, каде што беа евакуирани неколку мали населби, споменаа мал напредок во гаснењето на пожарите во нивната област.
Временските услови се многу сушни во моментов. Бидете внимателни за да можеме да дадеме се од себе со цел да избегнеме катастрофална сезона на пожари, изјави премиерот на Британска Колумбија, Дејвид Еби.
Повеќе од 13.000 луѓе беа евакуирани од градовите во северниот дел на Квебек.
Везина истакна дека некои патишта кои биле затворени, сега се повторно отворени за сообраќај, додавајќи дека „се движи во вистинска насока“.
Г. Т.
