Шест од 10 млади лица во земјава сметаат дека воопшто не можат да влијаат врз тоа како работат властите, а една третина од нив веруваат дека Северна Македонија по пет години ќе биде подобро место за живеење за младите, покажуваа податоците што беа презентирани на денешната конференција организирана од Вестминстерската фондација за демократија (ВФД) и Младински образовен форум (МОФ).
Според овие податоци, 60 отсто од младите веруваат дека Северна Македонија ќе стане членка на Европската унија, додека 70 проценти од нив сметаат дека тоа ќе се случи во следните пет години. Младите кои веруваат во европската перспектива на земјата се помалку расположени да си заминат од земјата, додека оние кои се граѓански ангажирани се позадоволни со своето место во општеството од своите врсници.
Во обраќањето на конференцијата министерот за образование и наука Арбер Адеми оцени дека резултатите од ваквите истражувања се важни за институциите, бидејќи тие се индикатор за задоволството и незадоволството на младите од нивното учество и вклученост во општеството.
– Преку ова истражување се иницираат нови идеи и можности за соработка. Неколку од заклучоците кои ни беа презентирани претходно, се вклучени во новите закони во образованието преку кои се овозможува поголема вклученост на учениците во процесот на одлучување за програмите во нивните училишта, истакна Адеми.
Претставникот на ВФД, Дамир Незири потенцира дека истражувањето е насловено „Апатија, оптимизам или разочараност?“, три зборови кои, како што рече, совршено ги сублимираат ставовите на младите во однос на нивното место во општеството.
– Тие не се информираат за општествено политичките случувања, но речиси секогаш гласаат на избори; сметат дека не се доволно консултирани и вклучени во процесите на одлучување, но сепак голем дел од нив веруваат дека во иднина ќе биде подобро, особено ако државата стане дел од Европската унија, нагласи Незири.
Учесниците на конференцијата оценија дека податоците од истражувањето не се изненадувачки ако се има предвид дека 85 проценти од младите се изјасниле дека никогаш не биле консултирани од властите, ниту на локално, ниту на централно ниво.
Целта на студијата е да се дадат повеќе информации за перцепциите на младите и политиките и пристапите кои треба да се преземат за да се подобри нивната позиција во општеството, поради што младите луѓе треба да бидат високо на листата на приоритети на националните и локалните власти, образовните институции, граѓанските организации и медиумите за да се поддржи нивното активно учество во општествените текови.
ВФД информира дека во соработка со МОФ и со поддршка на британската Влада ќе продолжи да работи на овие прашања, преку активности во кои ќе бидат вклучени ученици и студенти, претставници на партиските подмладоци и граѓанските организации, но и преку давање поддршка на Клубот на млади пратеници, кој, како што смета Фондацијата, е светол пример за искрена соработка за подобрување на положбата на младите.