Покраинскиот суд во Хамбург донесе привремена извршна мерка со која му забрани на германскиот неделник „Шпигел“ да го поврзува српскиот претседател Александар Вучиќ со наводни злосторства поврзани со таканареченото „Сараевско сафари“ за време на војната во Босна и Херцеговина. Според судската одлука, објавениот текст не ги исполнувал стандардите за известување кога станува збор за сериозни обвинувања кои можат значително да го нарушат угледот на една личност.
Судот утврдил дека написот на „Шпигел“, објавен во март 2026 година, не бил поткрепен со доволно веродостојни докази за да се оправдаат сомневањата изнесени во него. Во образложението се наведува дека медиумите имаат право да истражуваат и да објавуваат информации од јавен интерес, но истовремено се должни да ги почитуваат основните професионални и правни стандарди, особено кога станува збор за наводи за воени злосторства.
Според судот, редакцијата не обезбедила доволна доказна основа за ваквите тврдења, ниту пак му овозможила на Вучиќ соодветно да се изјасни пред објавувањето на текстот. Доколку „Шпигел“ ја прекрши забраната, може да се соочи со парична казна до 250.000 евра.
Контроверзите околу приказната за „Сараевското сафари“ потекнуваат од книгата „Викенд снајперисти“ на италијанскиот автор Ецио Гавацени, во која се изнесуваат тврдења дека богати странци плаќале за да пукаат врз цивили во опколено Сараево.
Во својата одлука, судот посебно ја истакна важноста на презумпцијата на невиност и предупреди дека новинарите не смеат да претставуваат сомневања како утврдени факти. Судскиот совет нагласил дека сериозните обвинувања мора да бидат поткрепени со проверени извори и внимателна новинарска проверка.
Од кабинетот на српскиот претседател пресудата ја оценија како потврда дека правната држава и медиумската одговорност мора да важат за сите, без оглед на политичката позиција на лицата за кои се известува. Од друга страна, „Шпигел“ соопшти дека ќе ја почитува судската одлука, но останува на ставот дека нивното истражување е од јавен интерес.
ЦИВИЛ Медиа Деск
